യുഎഇയിൽ ബുധനാഴ്ച ശരത്കാലത്തിന് തുടക്കമാകും

ദുബായ് : യുഎഇയിൽ ബുധനാഴ്ച (സെപ്റ്റംബർ 23) പുലർച്ചെ 4.05-ഓടെ ജ്യോതിശാസ്ത്രപരമായി ശരത്കാലത്തിന് (Autumn) തുടക്കമാകും. ഇതോടെ രാജ്യത്ത് താപനില ക്രമാനുഗതമായി കുറയാൻ തുടങ്ങുകയും വരും മാസങ്ങളിൽ മഴയ്ക്കുള്ള സാധ്യത വർദ്ധിക്കുകയും ചെയ്യുമെന്ന് എമിറേറ്റ്സ് അസ്ട്രോണമി സൊസൈറ്റി ചെയർമാൻ ഇബ്രാഹിം അൽ ജർവാൻ വ്യക്തമാക്കി. ശരത്കാലത്തിന്റെ തുടക്കത്തിൽ പകലും രാത്രിയും തുല്യമായിരിക്കുമെങ്കിലും പിന്നീട് രാത്രുകൾ നീളാൻ തുടങ്ങും. സീസണിന്റെ തുടക്കത്തിൽ പരമാവധി താപനില 39 ഡിഗ്രി സെൽഷ്യസും കുറഞ്ഞ താപനില 26 ഡിഗ്രി സെൽഷ്യസുമാകും. നവംബർ ആദ്യവാരമാകുമ്പോൾ താപനില ഗണ്യമായി കുറഞ്ഞ് ഉയർന്ന താപനില 31 ഡിഗ്രിയിലേക്കും കുറഞ്ഞ താപനില 18 ഡിഗ്രിയിലേക്കും എത്തും. ഡിസംബർ 22-ഓടെ ശീതകാല അയനത്തിലേക്ക് കടക്കുമ്പോൾ താപനില വീണ്ടും കുറയും. ആദ്യപകുതിയിൽ ഈർപ്പം വർദ്ധിക്കുന്നതിനാൽ പുലർച്ചെ മൂടൽമഞ്ഞിന് സാധ്യതയുണ്ട്. കൂടാതെ ഈ കാലയളവ് കൃഷിക്കായി വിത്തിടാനും തൈകൾ നടാനും ഏറ്റവും അനുയോജ്യമായ സമയമാണെന്നും അദ്ദേഹം കൂട്ടിച്ചേർത്തു.