എൽ നിനോ പ്രതിഭാസത്തെ തുടർന്ന് കനത്ത മഴയ്ക്കും ഈർപ്പത്തിനും സാധ്യതയെന്ന് റിപ്പോർട്ട്

ദുബൈ : പസഫിക് സമുദ്രത്തിലുണ്ടാകുന്ന ‘എൽ നിനോ’ (El Niño) പ്രതിഭാസത്തിന്റെ സ്വാധീനം മൂലം വരും മാസങ്ങളിൽ യുഎഇയിൽ അന്തരീക്ഷ ഈർപ്പവും (Humidity) ശരത്കാല മഴയ്ക്കുള്ള സാധ്യതയും വർദ്ധിക്കുമെന്ന് റിപ്പോർട്ട്. വേൾഡ് മെറ്റീരിയോളജിക്കൽ ഓർഗനൈസേഷന്റെ (WMO) വിലയിരുത്തൽ പ്രകാരം ജൂലൈ-സെപ്റ്റംബർ മാസങ്ങൾക്കിടയിൽ പസഫിക് മേഖലയിൽ ശക്തമായ എൽ നിനോ രൂപപ്പെടാൻ ഉയർന്ന സാധ്യതയുണ്ട്. നിലവിൽ വേനൽക്കാലത്ത് ഇതിന്റെ നേരിട്ടുള്ള പ്രത്യാഘാതങ്ങൾ പ്രകടമല്ലെങ്കിലും, ഒക്ടോബർ, നവംബർ മാസങ്ങളോടെ യുഎഇ ഉൾപ്പെടുന്ന മേഖലയിൽ ഇതിന്റെ മാറ്റങ്ങൾ കണ്ടുതുടങ്ങുമെന്ന് ദേശീയ കാലാവസ്ഥാ നിരീക്ഷണ കേന്ദ്രത്തിലെ (NCM) വിദഗ്ധൻ അഹമ്മദ് ഹബീബ് വ്യക്തമാക്കി. എൽ നിനോ രാജ്യത്തെ താപനിലയിൽ വലിയ വർദ്ധനവ് ഉണ്ടാക്കില്ലെങ്കിലും, അന്തരീക്ഷത്തിലെ ഈർപ്പത്തിന്റെ അളവ് കൂട്ടുകയും ഇത് സപ്പോർട്ട് ചെയ്യുന്നതോടെ മേഘരൂപീകരണത്തിനും പെട്ടെന്നുള്ള ശക്തമായ മഴയ്ക്കും കാരണമാകുമെന്നാണ് വിലയിരുത്തൽ.