വിദേശ നിക്ഷേപത്തിൽ റെക്കോർഡുമായി യുഎഇ; ലോകത്ത് ഒൻപതാം സ്ഥാനത്ത്

ദുബായ് : യുഎഇയിലേക്ക് കഴിഞ്ഞ വർഷം 17,730 കോടി ദിർഹത്തിന്റെ (AED 177.3 Billion) റെക്കോർഡ് വിദേശ നിക്ഷേപം (FDI) എത്തിയതായി ദുബായ് ഭരണാധികാരി ശൈഖ് മുഹമ്മദ് ബിൻ റാഷിദ് അൽ മക്തൂം അറിയിച്ചു. 6 ശതമാനം വളർച്ചയോടെയാണ് രാജ്യം ഈ ചരിത്ര നേട്ടം കൈവരിച്ചത്. ഇതോടെ ആഗോളതലത്തിൽ ഏറ്റവും കൂടുതൽ വിദേശ നിക്ഷേപം ആകർഷിക്കുന്ന രാജ്യങ്ങളുടെ പട്ടികയിൽ യുഎഇ ഒൻപതാം സ്ഥാനത്തേക്ക് മുന്നേറി. കൂടാതെ, പുതിയ വിദേശ നിക്ഷേപ പ്രൊജക്റ്റുകളുടെ എണ്ണത്തിൽ ലോക തലത്തിൽ രണ്ടാം സ്ഥാനം നിലനിർത്താനും യുഎഇക്ക് സാധിച്ചു. 2031-ഓടെ ആകെ വിദേശ നിക്ഷേപം 2.2 ട്രില്യൺ ദിർഹമാക്കുകയാണ് രാജ്യത്തിന്റെ അടുത്ത ലക്ഷ്യം.