ഷാർജ : അൽ ദൈദ് (Al Dhaid) സിറ്റി സെന്ററിലെ ഗതാഗതക്കുരുക്ക് ഒഴിവാക്കാനും സുരക്ഷ വർദ്ധിപ്പിക്കാനും ലക്ഷ്യമിട്ട് ഹെവി ട്രക്കുകൾക്കായി പുതിയ ബദൽ പാത ഒരുക്കാൻ ഉത്തരവിട്ട് ഷാർജ ഭരണാധികാരിയും സുപ്രീം കൗൺസിൽ അംഗവുമായ ഷെയ്ഖ് ഡോ. സുൽത്താൻ ബിൻ മുഹമ്മദ് അൽ ഖാസിമി. നഗരമധ്യത്തിലൂടെയുള്ള ട്രക്കുകളുടെ നിരന്തരമായ സർവീസ് ജനങ്ങൾക്ക് വലിയ ബുദ്ധിമുട്ടുണ്ടാക്കുന്ന പശ്ചാത്തലത്തിലാണ് ഈ നടപടി. ഷാർജ ബ്രോഡ്കാസ്റ്റിംഗ് കോർപ്പറേഷന്റെ ‘ഡയറക്ട് ലൈൻ’ പരിപാടിയിലൂടെയാണ് അദ്ദേഹം ഇക്കാര്യം വ്യക്തമാക്കിയത്.
ഇതോടൊപ്പം അൽ ദൈദിലെ എല്ലാ സർക്കാർ വകുപ്പുകളെയും അൽ ദൈദ് യൂണിവേഴ്സിറ്റി സ്ക്വയറിനും അൽ ദൈദ് സ്ക്വയറിനും ഇടയിലുള്ള റോഡിലെ പുതിയ അത്യാധുനിക കെട്ടിടങ്ങളിലേക്ക് മാറ്റാനും അദ്ദേഹം നിർദ്ദേശിച്ചു. നഗരത്തിന്റെ പാരമ്പര്യം വിളിച്ചോതുന്ന രീതിയിൽ അൽ ദൈദ് നഗരസഭയ്ക്കായി പുതിയൊരു ആസ്ഥാന മന്ദിരവും ഈ റോഡിൽ നിർമ്മിക്കും. നിലവിൽ റഷ് അവറുകളിൽ ട്രക്കുകൾക്ക് ഏർപ്പെടുത്തിയിട്ടുള്ള സമയനിയന്ത്രണങ്ങൾക്ക് പുറമെയാണ് ഇപ്പോൾ പുതിയ ബദൽ പാത വരുന്നത്. ഇത് നഗരത്തിലെ താമസക്കാർക്ക് വലിയ ആശ്വാസമാകും.