ദുബായ് : ദുബായ് ഫിനാൻഷ്യൽ സർവീസസ് അതോറിറ്റിയുടെ (DFSA) പേരിൽ നടക്കുന്ന പുതിയ തട്ടിപ്പിനെതിരെ ജനങ്ങൾക്ക് ജാഗ്രതാ നിർദ്ദേശം നൽകി അധികൃതർ. അതോറിറ്റിയുടെ പേരും ലോഗോയും ദുരുപയോഗം ചെയ്ത് പണം തട്ടിയെടുക്കാൻ ശ്രമിക്കുന്ന സംഘങ്ങളെക്കുറിച്ചാണ് മുന്നറിയിപ്പ്.
ലഭിക്കുന്ന ആളുടെ പേരിൽ പണവും സ്വർണ്ണക്കട്ടികളും അടങ്ങിയ ഒരു പെട്ടി ഡിഎഫ്‌എസി സൂക്ഷിച്ചിട്ടുണ്ടെന്ന് തെറ്റിദ്ധരിപ്പിച്ചാണ് തട്ടിപ്പ്. പെട്ടി രാജ്യത്തിന് പുറത്തേക്ക് അയക്കുന്നതിനായി അതിന്റെ ആകെ മൂല്യത്തിന്റെ 11.1 ശതമാനം ഫീസായി നൽകണമെന്ന് ആവശ്യപ്പെടുന്നു. ഡിഎഫ്‌എസിയുടെ വ്യാജ കംപ്ലയൻസ് ഡിപ്പാർട്ട്മെന്റ് ഓഫീസറാണെന്ന് അവകാശപ്പെട്ടാണ് തട്ടിപ്പുകാർ ഇത്തരത്തിൽ സമ്മർദ്ദം ചെലുത്തുന്നത്.
തട്ടിപ്പ് യഥാർത്ഥമാണെന്ന് വിശ്വസിപ്പിക്കാൻ, ഡിഎഫ്‌എസി ഓഫീസിലെ മേശപ്പുറത്ത് ഇരിക്കുന്ന പാക്കേജിന്റെ എഐ നിർമ്മിത ചിത്രങ്ങളും ഇവർ അയച്ചുനൽകുന്നുണ്ട്. പാക്കേജിൽ ഇരയുടെ പേരും വിലാസവും പതിപ്പിച്ചിട്ടുണ്ടാകും. ഇത്തരത്തിലുള്ള വ്യാജ സന്ദേശങ്ങളിലും കോളുകളിലും വീഴരുതെന്ന് അധികൃതർ കർശന നിർദ്ദേശം നൽകി.