ദുബായ് : ദുബായിലെ വൈദ്യുതി വിതരണ ശൃംഖലയുടെ വിശ്വാസ്യതയും സുരക്ഷയും വർദ്ധിപ്പിക്കുന്നതിനായി അത്യാധുനിക കൃത്രിമബുദ്ധി അധിഷ്ഠിത സ്മാർട്ട് സംവിധാനം നടപ്പിലാക്കി ദുബായ് ഇലക്ട്രിസിറ്റി ആൻഡ് വാട്ടർ അതോറിറ്റി (DEWA). ‘ഓട്ടോമാറ്റിക് സ്മാർട്ട് ഗ്രിഡ് റീസ്റ്റോറേഷൻ സിസ്റ്റം’ (ASGR) എന്ന പേരിലുള്ള ഈ അത്യാധുനിക സാങ്കേതികവിദ്യ പൂർണ്ണമായും സ്വയം പ്രവർത്തിക്കുന്ന ഒന്നാണ്. ദുബായുടെ ദ്രുതഗതിയിലുള്ള നഗര-സാമ്പത്തിക വളർച്ചയ്ക്ക് അനുസൃതമായി ഊർജ്ജ ശൃംഖലയെ സജ്ജമാക്കുകയാണ് ഇതിലൂടെ ലക്ഷ്യമിടുന്നത്.
വൈദ്യുതി ലൈനുകളിൽ ഉണ്ടാകുന്ന തകരാറുകൾ സെക്കൻഡുകൾക്കകം സ്വയം കണ്ടെത്തുകയും, ബാധിക്കപ്പെട്ട ഭാഗങ്ങളെ വേർതിരിച്ച് മറ്റ് പ്രദേശങ്ങളിലേക്ക് തടസ്സമില്ലാതെ വൈദ്യുതി എത്തിക്കുകയും ചെയ്യുന്ന ‘സെൽഫ് ഹീലിംഗ്’ (Self-healing) രീതിയിലാണ് ഈ സിസ്റ്റം പ്രവർത്തിക്കുന്നത്. ദുബായെ സ്മാർട്ട്-സുസ്ഥിര ഊർജ്ജ സംവിധാനങ്ങളിൽ ആഗോള തലപ്പത്ത് എത്തിക്കുകയാണ് തങ്ങളുടെ ലക്ഷ്യമെന്ന് ഡേവ എംഡിയും സിഇഒയുമായ സയീദ് മുഹമ്മദ് അൽ തായർ പറഞ്ഞു. അത്യാധുനിക കമ്മ്യൂണിക്കേഷൻ പ്രോട്ടോക്കോളുകൾ ഉപയോഗിക്കുന്നതിനാൽ സബ്‌സ്റ്റേഷനുകൾ തമ്മിൽ തത്സമയം വിവരങ്ങൾ കൈമാറാൻ സാധിക്കും. ഇത് സാങ്കേതിക ജീവനക്കാരുടെ ഫീൽഡ് ജോലികൾ കുറയ്ക്കുകയും സുരക്ഷിതത്വം വർദ്ധിപ്പിക്കുകയും ചെയ്യും. പുതിയ സ്മാർട്ട് ഗ്രിഡ് നടപ്പിലാക്കിയതോടെ വൈദ്യുതി തടസ്സങ്ങൾ പരിഹരിക്കുന്നതിനുള്ള സമയം ഗണ്യമായി കുറഞ്ഞതായി ഡേവ വിതരണ വിഭാഗം എക്സിക്യൂട്ടീവ് വൈസ് പ്രസിഡന്റ് റാഷിദ് ബിൻ ഹുമൈദാൻ വ്യക്തമാക്കി.