9
അബുദാബി : വിതരണ ശൃംഖലകൾ, വ്യാപാരം, ഊർജ്ജ പ്രവാഹം എന്നിവ സുരക്ഷിതമായി സംരക്ഷിക്കേണ്ടതിന്റെ പ്രാധാന്യത്തെക്കുറിച്ച് ഓർമ്മിപ്പിച്ച് യുഎഇ സഹമന്ത്രി ഖലീഫ ഷഹീൻ അൽ മരാർ. അന്താരാഷ്ട്ര സമാധാനത്തിന്റെയും സുരക്ഷയുടെയും പ്രധാന സ്തംഭങ്ങളാണ് ഇവയെന്ന് അദ്ദേഹം വ്യക്തമാക്കി. 81-ാമത് ഐക്യരാഷ്ട്രസഭാ പൊതുസഭയുടെ ജനറൽ ഡിബേറ്റിന് മുന്നോടിയായി നടന്ന യോഗത്തിൽ സംസാരിക്കുകയായിരുന്നു അദ്ദേഹം.
വിതരണ ശൃംഖലകളിലും വ്യാപാരത്തിലുമുണ്ടാകുന്ന ഏത് ഭീഷണിയും ഭക്ഷ്യസുരക്ഷയെയും കൃഷിക്ക് ആവശ്യമായ വളങ്ങളുടെ ലഭ്യതയെയും പ്രതികൂലമായി ബാധിക്കുമെന്ന് അൽ മരാർ മുന്നറിയിപ്പ് നൽകി. ആഗോള സമ്പദ്‌വ്യവസ്ഥയെ ഇത് ഗുരുതരമായി ബാധിക്കുമെന്നും അദ്ദേഹം ചൂണ്ടിക്കാട്ടി. ഈ തടസ്സങ്ങളുടെ ആഘാതം ഏറ്റവും കൂടുതൽ അനുഭവിക്കുന്നത് ഗ്ലോബൽ സൗത്തിലെ രാജ്യങ്ങളായിരിക്കുമെന്നും, സ്ഥിതി തുടർന്നാൽ 45 ദശലക്ഷത്തോളം ആളുകൾ അതിരൂക്ഷമായ ഭക്ഷ്യക്ഷാമത്തിലേക്ക് തള്ളപ്പെടാമെന്നും വേൾഡ് ഫുഡ് പ്രോഗ്രാമിന്റെ കണക്കുകൾ ഉദ്ധരിച്ച് അദ്ദേഹം വ്യക്തമാക്കി.