സൈബർ തട്ടിപ്പുകൾ തടയാൻ ‘ഓപ്പറേഷൻ കോൺഫ്രന്റേഷൻ ഗോസ്റ്റ്’യുമായി യു.എഇ

അബുദാബി : ആർട്ടിഫിഷ്യൽ ഇന്റലിജൻസ് (AI) ഉൾപ്പെടെയുള്ള നൂതന സാങ്കേതികവിദ്യകൾ ഉപയോഗിച്ചുള്ളതും അതിർത്തികൾ കടന്നുള്ളതുമായ തട്ടിപ്പുകൾക്കെതിരെ ‘ഓപ്പറേഷൻ കോൺഫ്രന്റേഷൻ ഗോസ്റ്റ്’ (Operation Confrontation Ghost) ശക്തമായി തുടരുമെന്ന് യു.എഇ ആഭ്യന്തര മന്ത്രാലയം സ്ഥിരീകരിച്ചു. 30 രാജ്യങ്ങളും രണ്ട് അന്താരാഷ്ട്ര സംഘടനകളും സ്വകാര്യ-സാങ്കേതിക മേഖലകളിൽ നിന്നുള്ള 13 പങ്കാളികളും ഈ ഉദ്യമത്തിൽ പങ്കുചേരുന്നുണ്ട്.

ഡിജിറ്റൽ പ്ലാറ്റ്‌ഫോമുകൾ വഴിയുള്ള സാമ്പത്തിക തട്ടിപ്പുകൾ, ഓൺലൈൻ സെക്‌സ്ടോർഷൻ, എ.ഐ അധിഷ്ഠിത തട്ടിപ്പുകൾ എന്നിവയാണ് ഈ ഓപ്പറേഷൻ ലക്ഷ്യമിടുന്നത്. വിവരങ്ങൾ തത്സമയം കൈമാറാനും, പുതിയ തട്ടിപ്പുരീതികൾ നിരീക്ഷിക്കാനും, ഡാറ്റാ സംരക്ഷണം ഉറപ്പാക്കിക്കൊണ്ട് വേഗത്തിൽ നടപടിയെടുക്കാനും ഇതിലൂടെ സാധിക്കുന്നു. കുറ്റകൃത്യങ്ങളുടെ അതിർത്തി കടന്നുള്ള സ്വഭാവം കണക്കിലെടുത്ത് ഏജൻസികൾ തമ്മിലുള്ള വേഗത്തിലുള്ള ഏകോപനം അത്യാവശ്യമാണെന്ന് ഇന്റർനാഷണൽ കോഓപ്പറേഷൻ ഡിപ്പാർട്ട്‌മെന്റ് ഡയറക്ടർ ലെഫ്റ്റനന്റ് കേണൽ സയീദ് ഖൽഫാൻ അൽ കാബി വ്യക്തമാക്കി.