കുട്ടികളുടെ മെനുവിൽ ആരോഗ്യകരമായ ഭക്ഷണങ്ങൾ നിർബന്ധമാക്കി അബുദാബി

അബുദാബി : അബുദാബിയിലെ ഹോട്ടലുകളിലും ടൂറിസം ലൈസൻസുള്ള ഭക്ഷണശാലകളിലും കുട്ടികളുടെ മെനുവിലെ ഭക്ഷണങ്ങളിൽ കുറഞ്ഞത് പകുതിയെണ്ണമെങ്കിലും ആരോഗ്യകരമായവ ആയിരിക്കണമെന്ന് വ്യവസ്ഥ ചെയ്യുന്ന പുതിയ നിയമം ഒക്ടോബർ 1 മുതൽ നിലവിൽ വന്നു. അബുദാബി ഡിപ്പാർട്ട്മെന്റ് ഓഫ് കൾച്ചർ ആൻഡ് ടൂറിസം (DCT Abu Dhabi) ആണ് ‘സെഹ്ഹി’ (SEHHI) പോഷകാഹാര മാനദണ്ഡങ്ങൾ പ്രകാരം ഈ ഉത്തരവ് നടപ്പിലാക്കിയത്. ഫ്രഞ്ച് ഫ്രൈസിന് പകരം പച്ചക്കറികൾ ഉൾപ്പെടുത്തുന്നതിലുപരി അടുക്കളകളിൽ തയ്യാറാക്കുന്ന ഓരോ വിഭവങ്ങളുടെയും കൃത്യമായ പോഷകമൂല്യം ഉറപ്പാക്കാൻ ഈ നിയമം ഇടയാക്കുമെന്ന് വിദഗ്ധർ അഭിപ്രായപ്പെടുന്നു. കുട്ടികൾ എളുപ്പത്തിൽ തെരഞ്ഞെടുക്കുന്ന ഭക്ഷണങ്ങളിൽ പോഷകാഹാര ഗുണനിലവാരം ഉറപ്പാക്കേണ്ടത് പ്രധാനമാണെന്ന് മെദ്കെയർ റോയൽ സ്പെഷ്യാലിറ്റി ഹോസ്പിറ്റലിലെ ക്ലിനിക്കൽ ഡയറ്റീഷ്യൻ റഹാഫ് മൊഹമ്മദ് അൽതോവൈർഖി വ്യക്തമാക്കി. കേവലം ലേബലുകൾ നൽകുന്നതിന് പകരം ഭക്ഷണത്തിന്റെ യഥാർത്ഥ പോഷകമൂല്യത്തിനാണ് മുൻഗണന നൽകേണ്ടതെന്നും അവർ ചൂണ്ടിക്കാണിച്ചു.