ദുബൈ: പ്രവാചകസ്നേഹത്തിന്റെ സന്ദേശമുയർത്തി ഐ സി എഫ് – മർകസ് സംയുക്തമായി സംഘടിപ്പിക്കുന്ന “ഖൽബിലുണ്ട് എന്റെ നബി” മീലാദ് ഗ്രാൻഡ് കോൺഫറൻസ് ഓഗസ്റ്റ് 29 ശനിയാഴ്ച വൈകുന്നേരം 5 മണി മുതൽ ദുബൈ ഖിസൈസ് വുഡ്ലം പാർക്ക് സ്കൂളിൽ വെച്ച് നടക്കും.
ദുബൈ മതകാര്യ വകുപ്പുമായി സഹകരിച്ചാണ് കോൺഫറൻസ് സംഘടിപ്പിക്കുന്നത്. ചടങ്ങിൽ ഇന്ത്യൻ ഗ്രാൻഡ് മുഫ്തി കാന്തപുരം എ.പി. അബൂബക്കർ മുസ്ലിയാർ മുഖ്യാതിഥിയായി പങ്കെടുത്ത് സംസാരിക്കും. കുടുംബ ജീവിതത്തിന്റെ പ്രാധാന്യം ഉയർത്തിക്കാട്ടാൻ ഈ വർഷം യു എ ഇ ആചരിക്കുന്ന ‘ഫാമിലി ഇയർ’ സന്ദേശത്തിന്റെ ഭാഗമായി പ്രവാചകൻ മുഹമ്മദ് നബി(സ)യുടെ ജീവിതവും സ്നേഹസന്ദേശങ്ങളും അനുസ്മരിക്കുന്ന വിവിധ പരിപാടികൾ കോൺഫറൻസിൽ ഉൾപ്പെടുത്തിയിട്ടുണ്ട്.
പരിപാടിയിൽ എസ്.എസ്.എഫ് കേരള സെക്രട്ടറി അനസ് അമാനി പുഷ്പഗിരി മുഖ്യപ്രഭാഷണം നടത്തും. മത–സാമൂഹിക രംഗത്തെ പ്രമുഖർ സംബന്ധിക്കുന്ന ചടങ്ങിൽ കുടുംബങ്ങൾക്കായി വിപുലമായ സീറ്റിംഗ് സൗകര്യങ്ങളാണ് ഒരുക്കിയിട്ടുള്ളതെന്ന് സംഘാടകർ അറിയിച്ചു.