ദുബായ്: ദുബായിലെയും വടക്കൻ എമിറേറ്റുകളിലെയും ഇന്ത്യയുടെ പുതിയ കോൺസൽ ജനറലായി 2008 ബാച്ച് ഐഎഫ്എസ് (IFS) ഉദ്യോഗസ്ഥനായ ഡോ. എമ്മാടി വിഷ്ണു വർധൻ റെഡ്ഡിയെ നിയമിച്ചു. കാലാവധി പൂർത്തിയാക്കി മടങ്ങുന്ന സതീഷ് കുമാർ ശിവന് പകരക്കാരനായാണ് അദ്ദേഹം പുതിയ ചുമതലയേൽക്കുന്നത്.
ദുബായിലെ ഇന്ത്യൻ കോൺസുലേറ്റിന്റെ തലപ്പത്തെത്തുന്ന തെലങ്കാനയിൽ നിന്നുള്ള ആദ്യത്തെ ഐഎഫ്എസ് ഉദ്യോഗസ്ഥൻ കൂടിയാണ് ഡോ. റെഡ്ഡി. ന്യൂഡൽഹി എയിംസിൽ (AIIMS) നിന്ന് എംഡി ബിരുദം നേടിയ അദ്ദേഹം, വിദേശകാര്യ മന്ത്രാലയത്തിന്റെ യൂറോപ്പ് വെസ്റ്റ്, ലാറ്റിൻ അമേരിക്ക, എക്സ്റ്റേണൽ പബ്ലിസിറ്റി തുടങ്ങി വിവിധ വിഭാഗങ്ങളിൽ സേവനമനുഷ്ഠിച്ചിട്ടുണ്ട്. മുൻപ് മാഡ്രിഡിലും ജനീവയിലും നയതന്ത്ര പ്രതിനിധിയായി പ്രവർത്തിച്ചിട്ടുള്ള അദ്ദേഹത്തിന്റെ ഗൾഫ് മേഖലയിലെ ആദ്യ നയതന്ത്ര നിയമനമാണിത്.
ഹൈദരാബാദിൽ റീജനൽ പാസ്പോർട്ട് ഓഫീസറായും തെലങ്കാന സർക്കാരിൽ ഇൻവെസ്റ്റ്മെന്റ് പ്രൊമോഷൻ വിഭാഗം സ്പെഷൽ സെക്രട്ടറിയായും അദ്ദേഹം പ്രവർത്തിച്ചിട്ടുണ്ട്. ദുബായിലെയും വടക്കൻ എമിറേറ്റുകളിലെയും ദശലക്ഷക്കണക്കിന് വരുന്ന പ്രവാസി ഭാരതീയരുടെ ക്ഷേമം ഉറപ്പാക്കുന്നതിനും ഇന്ത്യ-യുഎഇ വ്യാപാര നയതന്ത്ര ബന്ധങ്ങൾ കൂടുതൽ ശക്തമാക്കുന്നതിനും പുതിയ നിയമനം കരുത്തേകും.