മെട്രോ ലിങ്കോടെ എത്തിഹാദ് റെയിൽ ദുബൈ സ്റ്റേഷൻ സപ്തംബർ മുപ്പതിന് തുറക്കും

ദുബൈ : യുഎഇയുടെ ദേശീയ റെയിൽവേ ശൃംഖലയായ എത്തിഹാദ് റെയിലിന്റെ (Etihad Rail) ദുബൈ പാസഞ്ചർ സ്റ്റേഷൻ 2026 സപ്തംബർ 30-ന് യാത്രക്കാർക്കായി തുറന്നുനൽകും. ഷാർജയിലെ അൽ ദൈദ് (Al Dhaid) സ്റ്റേഷനൊപ്പം രണ്ടാം ഘട്ടത്തിലാകും ദുബൈ സ്റ്റേഷൻ തുറക്കുക. ദുബൈയിലെ തെക്കൻ മേഖലയിലുള്ള ജുമൈറ ഗോൾഫ് എസ്റ്റേറ്റ്‌സിലാണ് (Jumeirah Golf Estates) ഈ അത്യാധുനിക സ്റ്റേഷൻ സ്ഥിതി ചെയ്യുന്നത്. നിലവിലുള്ള ജുമൈറ ഗോൾഫ് എസ്റ്റേറ്റ്സ് മെട്രോ സ്റ്റേഷനുമായി ഇതിനെ നേരിട്ട് ബന്ധിപ്പിക്കുന്ന ഒരു കാൽനടപ്പാലത്തിന്റെ നിർമ്മാണം ഇപ്പോൾ പുരോഗമിക്കുകയാണ്.
ട്രെയിൻ ഇറങ്ങുന്ന യാത്രക്കാർക്ക് വെറും 4 മിനിറ്റുകൊണ്ട് ഈ പാലം വഴി മെട്രോ സ്റ്റേഷനിലേക്ക് മാറാനും, അവിടെ നിന്ന് ദുബൈയുടെ വിവിധ ഭാഗങ്ങളിലേക്ക് സുഗമമായി യാത്ര ചെയ്യാനും സാധിക്കും. മെട്രോയ്ക്ക് പുറമെ ടാക്സി, ആർടിഎ ബസുകൾ എന്നിവയും സ്റ്റേഷനുമായി ബന്ധിപ്പിക്കും. 11 നഗരങ്ങളെ തമ്മിൽ ബന്ധിപ്പിക്കുന്ന 900 കിലോമീറ്റർ നീളമുള്ള എത്തിഹാദ് റെയിൽ പദ്ധതിയിൽ ഓരോ ട്രെയിനിലും ഒരേസമയം 400 യാത്രക്കാർക്ക് സഞ്ചരിക്കാനാകും. അൽ മക്തൂം അന്താരാഷ്ട്ര വിമാനത്താവളത്തിലേക്ക് ഇവിടെ നിന്നും 30 മിനിറ്റ് മാത്രമാണ് യാത്രാസമയം.