യുഎഇയിൽ മഴയ്ക്കും മൂടൽമഞ്ഞിനും ശക്തമായ കാറ്റിനും സാധ്യതയെന്ന് കാലാവസ്ഥാ നിരീക്ഷണം

അബുദാബി : യുഎഇയുടെ വിവിധ ഭാഗങ്ങളിൽ വരും ദിവസങ്ങളിൽ മഴയ്ക്കും മൂടൽമഞ്ഞിനും പൊടിക്കാറ്റിനും സാധ്യതയുള്ളതായി ദേശീയ കാലാവസ്ഥാ നിരീക്ഷണ കേന്ദ്രം (NCM) അറിയിച്ചു. രാജ്യത്തിന്റെ കിഴക്കൻ, തെക്കൻ മേഖലകളിൽ മഴമേഘങ്ങൾ രൂപപ്പെടാനും വരും ദിവസങ്ങളിൽ മഴ പെയ്യാനും സാധ്യതയുണ്ട്. രാത്രിയിലും പുലർച്ചെയും അന്തരീക്ഷത്തിൽ ഈർപ്പം ഉയരുകയും പടിഞ്ഞാറൻ തീരപ്രദേശങ്ങളിൽ മൂടൽമഞ്ഞ് രൂപപ്പെടുകയും ചെയ്യും. മണിക്കൂറിൽ 40 കിലോമീറ്റർ വരെ വേഗതയിൽ വീശിയടിക്കാവുന്ന കാറ്റ് പൊടിപടലങ്ങൾ ഉയർത്താൻ സാധ്യതയുള്ളതിനാൽ ഡ്രൈവർമാർ ജാഗ്രത പാലിക്കണം.
മഴയ്ക്ക് സാധ്യതയുണ്ടെങ്കിലും രാജ്യത്ത് ചൂട് ഉയർന്ന നിലയിൽ തന്നെ തുടരും. ലിവയിൽ 48 ഡിഗ്രി സെൽഷ്യസും, അൽ ഐനിൽ 46, ദുബൈയിലും ഷാർജയിലും 44, അബുദാബിയിൽ 43 ഡിഗ്രി സെൽഷ്യസ് വരെയും താപനില ഉയർന്നേക്കാം. ഫുജൈറയിൽ 36 ഡിഗ്രി സെൽഷ്യസ് ചൂടാണ് രേഖപ്പെടുത്തുകയെങ്കിലും അന്തരീക്ഷ ഈർപ്പം 85 ശതമാനം വരെ ഉയർന്നേക്കും. അറബിക്കടലിലും ഒമാൻ കടലിലും കടൽക്ഷോഭം സാധാരണ നിലയിലായിരിക്കുമെന്നും തിങ്കളാഴ്ചയോടെ താപനില വീണ്ടും നേരിയ തോതിൽ ഉയർന്നേക്കാമെന്നും കാലാവസ്ഥാ കേന്ദ്രം വ്യക്തമാക്കി.