അബുദാബി : യുഎഇയിലെ ധനകാര്യ സ്ഥാപനങ്ങളെയും പ്രധാന ഡിജിറ്റൽ ഇൻഫ്രാസ്ട്രക്ചറുകളെയും ലക്ഷ്യമിട്ട് നടന്ന ശക്തമായ സൈബർ ആക്രമണ പരമ്പരകൾ ദേശീയ സൈബർ സുരക്ഷാ സംവിധാനം വിജയകരമായി പ്രതിരോധിച്ചതായി യുഎഇ സൈബർ സെക്യൂരിറ്റി കൗൺസിൽ (CSC) അറിയിച്ചു. കൃത്യമായ സുരക്ഷാ പ്രോട്ടോക്കോളുകൾ വഴി ഭീഷണികൾ നേരത്തെ തന്നെ കണ്ടെത്തി നിർവീര്യമാക്കാൻ സാധിച്ചതിനാൽ രാജ്യത്തെ ബാങ്കിങ്, ധനകാര്യ സേവനങ്ങളെയോ ഇടപാടുകളെയോ ഈ ആക്രമണം ബാധിച്ചില്ല.
ഡിജിറ്റൽ സംവിധാനങ്ങൾ അട്ടിമറിക്കുക, സുരക്ഷാ വീഴ്ചകൾ മുതലെടുക്കുക, മാല്വെയറുകൾ (Malware) പ്രചരിപ്പിക്കുക തുടങ്ങിയ ലക്ഷ്യങ്ങളോടെയാണ് ഹാക്കർമാർ ആക്രമണം നടത്തിയത്. ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യ ഉപയോഗിച്ച് കൂടുതൽ സങ്കീർണ്ണമായ രീതിയിലാണ് പുതിയ സൈബർ ആക്രമണങ്ങൾ ആസൂത്രണം ചെയ്യുന്നതെന്ന് കൗൺസിൽ മുന്നറിയിപ്പ് നൽകി. മുഴുവൻ ധനകാര്യ സ്ഥാപനങ്ങളും ദേശീയ സൈബർ സുരക്ഷാ നയങ്ങൾ കൃത്യമായി പാലിക്കണമെന്നും സംശയാസ്പദമായ എന്തെങ്കിലും ശ്രദ്ധയിൽപ്പെട്ടാൽ ഉടൻ തന്നെ ഔദ്യോഗിക ചാനലുകൾ വഴി റിപ്പോർട്ട് ചെയ്യണമെന്നും അധികൃതർ ആവശ്യപ്പെട്ടു.