അബുദാബി: യുഎഇയിലെ വിദ്യാർത്ഥികൾക്കും കുടുംബങ്ങൾക്കുമായി വിനോദവും വിജ്ഞാനവും സാങ്കേതികവിദ്യയും കായിക വിനോദങ്ങളും കോർത്തിണക്കി ഒന്നാമത് ‘ശൈഖ് സായിദ് സമ്മർ ഫെസ്റ്റിവൽ’ ജൂലൈ 6 മുതൽ ആഗസ്ത് 23 വരെ നടക്കും. യുഎഇ പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്യാന്റെ രക്ഷാകർതൃത്വത്തിലും വൈസ് പ്രസിഡന്റും ഉപപ്രധാനമന്ത്രിയുമായ ശൈഖ് മൻസൂർ ബിൻ സായിദ് അൽ നഹ്യാന്റെ മാർഗ്ഗനിർദ്ദേശത്തിലുമാണ് മേഖലയിലെ തന്നെ ഏറ്റവും വലിയ ഈ സമ്മർ ഫെസ്റ്റ് സംഘടിപ്പിക്കുന്നത്. പൂർണ്ണമായും ശീതീകരിച്ച വേദികളിൽ ഒരുക്കുന്ന മേളയിൽ ഇന്നൊവേഷൻ ലാബുകൾ, വിദ്യാഭ്യാസ മേഖലകൾ, സ്പോർട്സ് സൗകര്യങ്ങൾ എന്നിവയുണ്ടാകും. 6 മുതൽ 18 വയസ്സുവരെയുള്ള കുട്ടികളുടെ ഭാവി കഴിവുകൾ വികസിപ്പിക്കാനും ദേശീയ മൂല്യങ്ങൾ വളർത്താനുമാണ് മേള ലക്ഷ്യമിടുന്നത്. മുഹമ്മദ് ബിൻ സായിദ് യൂണിവേഴ്സിറ്റി ഓഫ് ആർട്ടിഫിഷ്യൽ ഇന്റലിജൻസ് ഒരുക്കുന്ന ‘എഐ ആൻഡ് ഇന്നൊവേഷൻ വേൾഡ്’ പവലിയൻ, ആക്റ്റ്വെറ്റിന്റെ (ACTVET) സ്കിൽസ് ക്യാമ്പ്, സൈബർ സുരക്ഷാ ക്ലാസുകൾ, സ്പോർട്സ്-ഹെറിറ്റേജ് ആക്ടിവിറ്റികൾ എന്നിവ മേളയുടെ പ്രധാന ആകർഷണങ്ങളാണ്. വരും വർഷങ്ങളിൽ യുഎഇയുടെ വേനലവധിക്കാലത്തെ ഏറ്റവും വലിയ വാർഷിക വിജ്ഞാനോത്സവമാക്കി ഇതിനെ മാറ്റാനാണ് സംഘാടകരുടെ തീരുമാനം.
12