ബ്രാൻഡ് മൂല്യത്തിൽ ലോകത്ത് അഞ്ചാമതായി ദുബായ്; കരുത്തായി ഡിജിറ്റൽ ദുബായ്

ദുബായ് : പ്രമുഖ അന്താരാഷ്ട്ര ബ്രാൻഡ് മൂല്യനിർണ്ണയ കൺസൾട്ടൻസിയായ ‘ബ്രാൻഡ് ഫിനാൻസ്’ (Brand Finance) പുറത്തുവിട്ട ആഗോള നഗരങ്ങളുടെ പട്ടികയിൽ ഒന്നാം നിരയിലേക്ക് ഉയർന്ന് ദുബായ്. ഒരു ട്രില്യൺ ദിർഹത്തോട് (Dh1 trillion) അടുത്ത ബ്രാൻഡ് മൂല്യവുമായി ലോകത്തെ ഏറ്റവും ശക്തമായ അഞ്ച് നഗരങ്ങളുടെ പട്ടികയിലാണ് ദുബായ് ഇടംപിടിച്ചത്. ദുബായുടെ ഈ ചരിത്ര നേട്ടത്തിന് പിന്നിൽ ‘ഡിജിറ്റൽ ദുബായ്’ നിർണ്ണായക പങ്ക് വഹിച്ചതായി റിപ്പോർട്ടിൽ വ്യക്തമാക്കുന്നു. ദുബായുടെ ആകെ ബ്രാൻഡ് മൂല്യത്തിൽ ഏകദേശം 31 ബില്യൺ ദിർഹത്തിന്റെ സംഭാവന ഡിജിറ്റൽ ദുബായിലൂടെയാണ് ലഭ്യമായത്. കൂടാതെ ആഗോള ഡിജിറ്റൽ ഗവൺമെന്റ് സ്ഥാപനങ്ങളുടെ പട്ടികയിൽ മികച്ച റേറ്റിംഗായ AA+ ഡിജിറ്റൽ ദുബായ് സ്വന്തമാക്കി. ആഗോള സിറ്റി ബ്രാൻഡ് ഇൻഡക്സിൽ ദുബായിയെ ഏഴാം സ്ഥാനത്ത് നിന്ന് അഞ്ചാം സ്ഥാനത്തേക്ക് ഉയർത്താൻ ഡിജിറ്റൽ ദുബായുടെ വിപ്ലവകരമായ സ്മാർട്ട് സേവനങ്ങൾ സഹായിച്ചതായി ഡിജിറ്റൽ ദുബായ് ഡയറക്ടർ ജനറൽ ഹമദ് ഉബൈദ് അൽ മൻസൂരി ഉൾപ്പെടെയുള്ള പ്രമുഖർ ചൂണ്ടിക്കാട്ടി.