ന്യൂഡൽഹി: ടെലിഗ്രാം വഴി വ്യാപകമായി പുതിയ സിനിമകളും ഒടിടി (OTT) കണ്ടന്റുകളും ചോരുന്നതിൽ കർശന നടപടിയുമായി ഇന്ത്യൻ ഗവൺമെന്റ്. പൈറസി തടയുന്നതിന്റെ ഭാഗമായി മെസ്സേജിങ് പ്ലാറ്റ്‌ഫോമായ ടെലിഗ്രാമിന് കേന്ദ്ര സർക്കാർ നോട്ടീസ് അയച്ചു. അനധികൃതമായി പങ്കുവെക്കുന്ന പകർപ്പവകാശമുള്ള കണ്ടന്റുകൾ ഉടനടി നീക്കം ചെയ്യാനും പൈറസിക്ക് തടയിടാൻ അടിയന്തര നടപടികൾ സ്വീകരിക്കാനും വാർത്താവിതരണ പ്രക്ഷേപണ മന്ത്രാലയം നിർദ്ദേശം നൽകി.
ഈ വിഷയത്തിൽ പ്ലാറ്റ്‌ഫോം സ്വീകരിച്ച നടപടികൾ വ്യക്തമാക്കി 15 ദിവസത്തിനകം റിപ്പോർട്ട് (Action Taken Report) സമർപ്പിക്കാനും ടെലിഗ്രാമിനോട് മന്ത്രാലയം ആവശ്യപ്പെട്ടിട്ടുണ്ട്. പുതിയ സിനിമകളും വെബ് സീരീസുകളും റിലീസ് ദിവസം തന്നെ ടെലിഗ്രാമിലെ വിവിധ ഗ്രൂപ്പുകൾ വഴി ചോരുന്നത് സിനിമാ വ്യവസായത്തിന് വലിയ സാമ്പത്തിക നഷ്ടമുണ്ടാക്കുന്ന പശ്ചാത്തലത്തിലാണ് സർക്കാരിന്റെ ഈ നിർണായക ഇടപെടൽ.