ഒഡീഷയുടെ പുതിയ സാമ്പത്തിക ലക്ഷ്യങ്ങൾ കൈവരിക്കാൻ യുഎഇ പങ്കാളിത്തം തേടി മുഖ്യമന്ത്രി മോഹൻ ചരൺ മാജി

അബുദാബി : 2036 ഓടെ 500 ബില്യൺ ഡോളർ സമ്പദ്‌വ്യവസ്ഥയും 2047 ഓടെ 1.5 ട്രില്യൺ ഡോളർ സമ്പദ്‌വ്യവസ്ഥയും കൈവരിക്കുകയെന്ന ലക്ഷ്യത്തോടെ യുഎഇയിൽ നിന്നുള്ള നിക്ഷേപങ്ങൾ ക്ഷണിച്ച് ഒഡീഷ മുഖ്യമന്ത്രി മോഹൻ ചരൺ മാജി. ഉന്നതതല പ്രതിനിധി സംഘത്തോടൊപ്പം മൂന്ന് ദിവസത്തെ സന്ദർശനത്തിനായി യുഎഇയിലെത്തിയ അദ്ദേഹം ഗൾഫ് ന്യൂസിന് നൽകിയ പ്രത്യേക അഭിമുഖത്തിലാണ് ഇക്കാര്യം അറിയിച്ചത്. വ്യാവസായിക വളർച്ച, സാങ്കേതികവിദ്യ, ശുദ്ധോർജ്ജം, ലോജിസ്റ്റിക്സ്, ടൂറിസം എന്നീ മേഖലകളിൽ യുഎഇയുമായി ദീർഘകാല തന്ത്രപ്രധാന സഹകരണമാണ് ഒഡീഷ ലക്ഷ്യമിടുന്നത്.
അബുദാബി ആസ്ഥാനമായുള്ള ഇന്റർനാഷണൽ ഹോൾഡിംഗ് കമ്പനിയും (IHC) അദാനി ഗ്രൂപ്പും ചേർന്ന് ഒഡീഷയിൽ 11.5 ബില്യൺ ഡോളറിന്റെ അലുമിനിയം കോംപ്ലക്സ് പദ്ധതി ജൂലൈയിൽ പ്രഖ്യാപിച്ചിരുന്നു. ഇതിനുപിന്നാലെയാണ് കൂടുതൽ യുഎഇ കമ്പനികളെ സംസ്ഥാനത്തേക്ക് ആകർഷിക്കാൻ സർക്കാർ നീക്കം സജീവമാക്കിയത്. 2025-26 സാമ്പത്തിക വർഷത്തിൽ 7.9% സാമ്പത്തിക വളർച്ച കൈവരിച്ച ഒഡീഷ, കേവലം ഖനന മേഖലയിൽ മാത്രം ഒതുങ്ങാതെ നിർമ്മാണ, സാങ്കേതിക മേഖലകളിലേക്ക് ശ്രദ്ധ കേന്ദ്രീകരിക്കുകയാണെന്ന് മുഖ്യമന്ത്രി വ്യക്തമാക്കി.