അൽ ഐൻ : ജോലിയിൽ നിന്ന് പിരിച്ചുവിട്ടതിന് പിന്നാലെ കമ്പനിയുടെ വാഹനം നിയമവിരുദ്ധമായി കൈവശം വെച്ച മുൻ ജീവനക്കാരന് 30,000 ദിർഹം പിഴ വിധിച്ച് അൽ ഐൻ സിവിൽ ഫസ്റ്റ് ഇൻസ്റ്റൻസ് കോടതി. ആനുകൂല്യങ്ങൾ നൽകുന്നതുമായി ബന്ധപ്പെട്ട തർക്കത്തെ തുടർന്ന് കമ്പനി വാഹനം തിരികെ നൽകാൻ ഇയാൾ വിസമ്മതിക്കുകയായിരുന്നു. എന്നാൽ, വാഹനം വിട്ടുനൽകാത്തത് വഴി കമ്പനിയുടെ ബിസിനസ്സ് പ്രവർത്തനങ്ങൾക്ക് തടസ്സം സൃഷ്ടിച്ചതായും ഇത് സാമ്പത്തിക നഷ്ടത്തിന് കാരണമായതായും കോടതി കണ്ടെത്തി.
തന്റെ സർവീസ് ആനുകൂല്യങ്ങളും ശമ്പള കുടിശ്ശികയും കമ്പനി നൽകാനുണ്ടെന്നും അത് തീർപ്പാക്കുന്നതുവരെ ഗ്യാരന്റിയായാണ് വാഹനം വീട്ടിൽ സൂക്ഷിച്ചതെന്നുമായിരുന്നു പ്രതിഭാഗത്തിന്റെ വാദം. എന്നാൽ കോടതി ഈ വാദം പൂർണ്ണമായി തള്ളി. യുഎഇ നിയമപ്രകാരം തൊഴിൽ തർക്കങ്ങൾ നിലനിൽക്കുന്നുണ്ടെങ്കിൽ അതിനായി മിനിസ്ട്രി ഓഫ് ഹ്യൂമൻ റിസോഴ്‌സസ് ആൻഡ് എമിറട്ടൈസേഷനെയാണ് (MoHRE) സമീപിക്കേണ്ടതെന്നും അല്ലാതെ കമ്പനിയുടെ സ്വത്തുക്കൾ നിയമവിരുദ്ധമായി കൈവശം വെക്കാൻ ജീവനക്കാരന് അവകാശമില്ലെന്നും ജഡ്ജി വ്യക്തമാക്കി. പിഴ തുകയ്ക്ക് പുറമെ കേസിന്റെ കോടതി ചെലവുകളും ഇയാൾ തന്നെ വഹിക്കണം.