കാണാതായ എമിറാത്തി യുവതി മരിച്ച നിലയിൽ കണ്ടെത്തി

റാസൽഖൈമ : കാണാതായ എമിറാത്തി യുവതിയെ മരിച്ച നിലയിൽ കണ്ടെത്തിയതായി റാസൽഖൈമ പോലീസ് സ്ഥിരീകരിച്ചു. വ്യാഴാഴ്ചയാണ് പോലീസ് ഇക്കാര്യം ഔദ്യോഗികമായി അറിയിച്ചത്.

യുവതിയുടെ മൃതദേഹം കണ്ടെത്തിയതായി റാസൽഖൈമ പോലീസ് ജനറൽ ഹെഡ്ക്വാർട്ടേഴ്സ് പ്രസ്താവനയിൽ വ്യക്തമാക്കി. യുവതിയുടെ കുടുംബാംഗങ്ങളുടെ ദുഃഖത്തിൽ പങ്കുചേരുന്നതായും പോലീസ് അനുശോചനം അറിയിച്ചു. ആരോഗ്യപ്രശ്നങ്ങളെ തുടർന്ന് യുവതിയെ കാണാതായതായി കാണിച്ച് പോലീസ് നേരത്തെ പൊതുജനങ്ങളുടെ സഹായം തേടിയിരുന്നു.

എന്നാൽ, മരണകാരണത്തെക്കുറിച്ചോ മറ്റ് സാഹചര്യങ്ങളെക്കുറിച്ചോ ഉള്ള കൂടുതൽ വിവരങ്ങൾ അധികൃതർ പുറത്തുവിട്ടിട്ടില്ല. അന്വേഷണവുമായി സഹകരിച്ച പൊതുജനങ്ങൾക്കും പോലീസ് നന്ദി അറിയിച്ചു.