എക്സിറ്റ് മിസ്സായെന്ന് കരുതി റോഡിൽ റിവേഴ്സ് എടുത്തേക്കല്ലേ; പണികിട്ടും

അബുദാബി : വാഹനം ഓടിക്കുമ്പോൾ എക്സിറ്റുകൾ തെറ്റിപ്പോയാൽ റോഡിൽ റിവേഴ്‌സ് എടുക്കുന്നത് അപകടകരമാണെന്ന് അബുദാബി പോലീസിന്റെ മുന്നറിയിപ്പ്. റോഡിലെ ഇത്തരത്തിലുള്ള അപകടകരമായ ഡ്രൈവിംഗ് രീതികൾ മൂലം ഉണ്ടായ വാഹനാപകടങ്ങളുടെ ദൃശ്യങ്ങൾ മോണിറ്ററിംഗ് ആൻഡ് കൺട്രോൾ സെന്ററുമായി സഹകരിച്ച് പോലീസ് പുറത്തുവിട്ടു.

പെട്ടെന്ന് വാഹനം നിർത്തുന്നതും റിവേഴ്‌സ് എടുക്കുന്നതും പിന്നിൽ വരുന്ന മറ്റ് ഡ്രൈവർമാരെ ആശയക്കുഴപ്പത്തിലാക്കുകയും ഗുരുതരമായ അപകടങ്ങൾക്കും പരിക്കുകൾക്കും കാരണമാവുകയും ചെയ്യുമെന്ന് ട്രാഫിക് ആൻഡ് സെക്യൂരിറ്റി പെട്രോൾസ് ഡയറക്ടറേറ്റ് വ്യക്തമാക്കി. എക്സിറ്റ് നഷ്ടപ്പെട്ടാൽ റിവേഴ്‌സ് എടുക്കാൻ ശ്രമിക്കാതെ, വണ്ടി മുന്നോട്ട് ഓടിച്ച് അടുത്തുള്ള എക്സിറ്റ് ഉപയോഗിച്ച് ലക്ഷ്യസ്ഥാനത്ത് എത്തണമെന്നാണ് പോലീസിന്റെ നിർദ്ദേശം.

അപകടകരമായ രീതിയിൽ റിവേഴ്‌സ് ചെയ്യുന്ന ഡ്രൈവർമാർക്ക് 500 ദിർഹം പിഴയും 4 ബ്ലാക്ക് പോയിന്റുകളും ലഭിക്കും. ജീവനോ സ്വത്തിനുപോലും അപകടം വരുത്തുന്ന തരത്തിലുള്ള ഗൗരവമേറിയ കുറ്റങ്ങൾക്ക് 2,000 ദിർഹം പിഴയും 23 ബ്ലാക്ക് പോയിന്റുകളും കൂടാതെ ലൈറ്റ് വാഹനം 60 ദിവസത്തേക്ക് കണ്ടുകെട്ടുന്നതുമാണ് ശിക്ഷ.