ദുബായ് : യുഎഇയുടെ ശക്തമായ സാമ്പത്തിക വളർച്ചയും ജനസംഖ്യാ വർദ്ധനവും ഉപഭോക്തൃ വിശ്വാസവും മുൻനിർത്തി രാജ്യത്ത് റീട്ടെയിൽ ക്രെഡിറ്റ് (വ്യക്തിഗത വായ്പകൾ) ആവശ്യപ്പെടുന്നവരുടെ എണ്ണത്തിൽ വൻ വർദ്ധനവ്. ആഗോള സാമ്പത്തിക അനിശ്ചിതത്വങ്ങൾക്കിടയിലും ഭവന വായ്പകൾ, വാഹന വായ്പകൾ, കുടുംബത്തിന്റെ ഭാവിയിലേക്കുള്ള നിക്ഷേപങ്ങൾ എന്നിവയ്ക്കായി ആളുകൾ വലിയ തോതിൽ ഫണ്ടിങ് തേടുന്നുണ്ടെന്ന് പ്രമുഖ യുഎഇ ബാങ്കായ അൽ മസ്റഫ് (Al Masraf) വ്യക്തമാക്കി.
ബാങ്കിന്റെ 50-ാം വാർഷികത്തോടനുബന്ധിച്ച് പുതിയ കോർപ്പറേറ്റ് ലോഗോയും ഐഡന്റിറ്റിയും പുറത്തിറക്കുന്ന ചടങ്ങിൽ സംസാരിക്കവെ അൽ മസ്റഫ് സിഇഓ ഫുആദ് മുഹമ്മദാണ് ഇക്കാര്യം അറിയിച്ചത്. ഉപഭോക്താക്കളുടെ ആവശ്യങ്ങൾക്കനുസരിച്ച് ഡിജിറ്റൽ സംവിധാനങ്ങൾ കൂടുതൽ വിപുലീകരിക്കുമെന്നും സുരക്ഷിതമായ വായ്പാ മാനദണ്ഡങ്ങൾ പാലിച്ച് മുന്നോട്ട് പോകുമെന്നും അദ്ദേഹം പറഞ്ഞു. യുഎഇയുടെ ‘വി ദ യുഎഇ 2031’ (We the UAE 2031) കാഴ്ചപ്പാടിന് അനുസൃതമായി ചെറുകിട-ഇടത്തരം സംരംഭങ്ങൾ (SMEs), ട്രേഡ് ഫിനാൻസ്, കയറ്റുമതി എന്നിവയ്ക്ക് കൂടുതൽ പിന്തുണ നൽകിക്കൊണ്ടുള്ള 2030 വരെയുള്ള സുസ്ഥിര വളർച്ചാ തന്ത്രങ്ങളും ബാങ്ക് പ്രഖ്യാപിച്ചു.