29
ദുബായ് : ആഡംബര യാട്ടിന്റെ ഉടമസ്ഥാവകാശം ആവശ്യപ്പെട്ട് ഒരു കമ്പനി നൽകിയ ഹർജി ദുബായ് കോടതി തള്ളി. ഈ വിഷയത്തിൽ നേരത്തെ തന്നെ അന്തിമ കോടതി വിധി വന്നിട്ടുള്ളതാണെന്നും അതിനാൽ കേസ് നിലനിൽക്കില്ലെന്നും കോടതി വ്യക്തമാക്കി. കോടതി ചെലവുകൾക്ക് പുറമെ നിയമപരമായ ഫീസായി 6,000 ദിർഹം നൽകാനും കമ്പനിയോട് ഉത്തരവിട്ടിട്ടുണ്ട്.
മറ്റൊരു കമ്പനിയുടെ പേരിൽ യാട്ട് രജിസ്റ്റർ ചെയ്തിട്ടുണ്ടെങ്കിലും അതിന്റെ നിർമ്മാണത്തിന് പണം മുടക്കിയത് തങ്ങളാണെന്നും അതിനാൽ തങ്ങളാണ് യഥാർത്ഥ ഉടമകളെന്നും വാദിച്ചാണ് കമ്പനി കോടതിയെ സമീപിച്ചത്. മുൻപ് വന്ന വിധി വഞ്ചനയിലൂടെയും കൃത്രിമത്തിലൂടെയും നേടിയെടുത്തതാണെന്നും അതിനാൽ ആ വിധി നടപ്പിലാക്കുന്നത് തടയണമെന്നും കമ്പനി ആവശ്യപ്പെട്ടിരുന്നു. എന്നാൽ ഈ വാദങ്ങൾ കോടതി തള്ളിക്കളയുകയായിരുന്നു.