ഷാർജ പോലീസിന് ഐ.എസ്.ഒ അംഗീകാരം

ഷാർജ : സാമൂഹിക പ്രതിബദ്ധതയ്ക്കുള്ള അന്താരാഷ്ട്ര അംഗീകാരമായ ഐ.എസ്.ഒ 26000 (ISO 26000) സർട്ടിഫിക്കേഷൻ കരസ്ഥമാക്കി ഷാർജ പോലീസ്. പോലീസിങ് രംഗത്ത് സാമൂഹിക ഉത്തരവാദിത്തം കൃത്യമായി നടപ്പിലാക്കുന്നതിനും, ഭരണം, മനുഷ്യാവകാശം, തൊഴിലിടങ്ങളിലെ മികച്ച മാതൃകകൾ, പരിസ്ഥിതി സംരക്ഷണം, സമൂഹവുമായി ഇടപഴകൽ തുടങ്ങിയ മേഖലകളിലെ മികവിനുമാണ് ഈ അംഗീകാരം ലഭിച്ചിരിക്കുന്നത്.

സുസ്ഥിര വികസനം, സാമൂഹിക സ്ഥിരത, ഐക്യം എന്നിവ ഉറപ്പാക്കുന്നതിനൊപ്പം പൊതുജനങ്ങൾക്കുള്ള സേവനങ്ങളുടെ നിലവാരം ഉയർത്തുക എന്ന ലക്ഷ്യത്തോടെ ഷാർജ പോലീസ് സ്വീകരിച്ച അന്താരാഷ്ട്ര മാതൃകകളാണ് ഈ നേട്ടത്തിന് പിന്നിൽ. സമഗ്രമായ സാമൂഹിക പ്രതിബദ്ധതാ നയങ്ങൾ രൂപീകരിക്കാനും, അവ ഔദ്യോഗിക പ്രവർത്തനങ്ങളിലും തന്ത്രങ്ങളിലും ഉൾപ്പെടുത്താനും പോലീസ് വിഭാഗം നടത്തിയ നിരന്തര പരിശ്രമങ്ങളുടെ ഫലമാണിത്. സമൂഹത്തിന്റെ ആവശ്യങ്ങൾ തിരിച്ചറിഞ്ഞ് അവയ്ക്ക് അനുയോജ്യമായ രീതിയിൽ നിരവധി പദ്ധതികളാണ് പോലീസ് ഇതിന്റെ ഭാഗമായി നടപ്പിലാക്കുന്നത്.