31
ദുബായ് : കഴിഞ്ഞ നാല് വർഷത്തിനിടയിൽ യുഎഇയിലുടനീളം ഹെവി ട്രക്കുകൾ ഉൾപ്പെട്ടത് 1,136 റോഡപകടങ്ങളിൽ. യുഎഇ ആഭ്യന്തര മന്ത്രാലയത്തിന്റെ (Ministry of Interior) കണക്കുകൾ പ്രകാരമാണ് ഈ ഞെട്ടിക്കുന്ന വിവരങ്ങൾ പുറത്തുവന്നിരിക്കുന്നത്. 2022 മുതൽ 2025 വരെയുള്ള കണക്കുകളാണ് അധികൃതർ പുറത്തുവിട്ടത്. തുടർച്ചയായ വർഷങ്ങളിൽ വർധിച്ചുവന്ന ട്രക്ക് അപകടങ്ങൾ 2024-ൽ എത്തിയപ്പോൾ സർവകാല റെക്കോർഡായ 332 അപകടങ്ങളിലാണ് എത്തിനിൽക്കുന്നത്.
2025-ലും സ്ഥിതിക്ക് വലിയ മാറ്റമുണ്ടായിട്ടില്ല. കഴിഞ്ഞ വർഷത്തെ അപേക്ഷിച്ച് ചെറിയ തോതിൽ കുറവുണ്ടായെങ്കിലും 325 അപകടങ്ങളാണ് ആ വർഷം മാത്രം രേഖപ്പെടുത്തിയത്. 2022-ൽ 208 ഉം, 2023-ൽ 271 ഉം അപകടങ്ങളാണ് രാജ്യത്ത് റിപ്പോർട്ട് ചെയ്തിരുന്നത്.
വാഹനങ്ങളുടെ കൃത്യമായ പരിപാലനമില്ലായ്മയും ടയറുകൾ തകരാറിലാകുന്നതുമാണ് ഇത്തരം അപകടങ്ങളുടെ പ്രധാന കാരണങ്ങളിലൊന്ന്. ദീർഘദൂര യാത്രകളും അമിതഭാരവും കാരണം ലോറികൾക്ക് ഉണ്ടാകുന്ന സാങ്കേതിക തകരാറുകൾ വലിയ അപകടങ്ങൾക്ക് വഴിവെക്കുന്നുണ്ട്. കൂടാതെ, ഡ്രൈവർമാരുടെ അശ്രദ്ധ, ഉറക്കം തൂങ്ങൽ, അമിതവേഗത, ലെയ്ൻ തെറ്റിച്ച് വണ്ടി ഓടിക്കൽ എന്നിവയും അപകടങ്ങളുടെ തോത് വർധിപ്പിക്കുന്നു. വേഗത കുറഞ്ഞ ട്രക്കുകളെ ചെറിയ വാഹനങ്ങളുടെ ഡ്രൈവർമാർ അപകടകരമായ രീതിയിൽ ഓവർടേക്ക് ചെയ്യാൻ ശ്രമിക്കുന്നതും പതിവായി അപകടങ്ങൾക്ക് കാരണമാകാറുണ്ട്.
ഇതുപോലുള്ള വലിയ അപകടങ്ങൾ ഒഴിവാക്കാൻ രാജ്യത്തെ ട്രാഫിക് പെട്രോൾ വകുപ്പുകൾ ശക്തമായ പരിശോധനകളാണ് നടത്തിവരുന്നത്. സുരക്ഷാ മാനദണ്ഡങ്ങൾ പാലിക്കാത്ത ട്രക്കുകൾക്കെതിരെ കർശന നടപടി സ്വീകരിക്കുമെന്നും ഡ്രൈവർമാർക്കായി ബോധവത്കരണ ക്യാമ്പെയ്നുകൾ ശക്തമാക്കുമെന്നും അധികൃതർ അറിയിച്ചു.