30
അബുദാബി : ആധുനിക പോലീസിംഗിന്റെ ആവശ്യകതകൾക്കനുസൃതമായി ഉദ്യോഗസ്ഥരെ പ്രാപ്തരാക്കുന്നതിന്റെ ഭാഗമായി, അൽ ഐനിലെ പോലീസ് ക്വാളിഫിക്കേഷൻ ഡിപ്പാർട്ട്മെന്റിന്റെ നേതൃത്വത്തിൽ സംഘടിപ്പിച്ച 49-ാമത് പോലീസ് ആൻഡ് സെക്യൂരിറ്റി യോഗ്യതാ കോഴ്സ് വിജയകരമായി പൂർത്തിയാക്കിയ 202 ട്രെയിനികൾ ബിരുദം നേടി. സൈഫ് ബിൻ സായിദ് അക്കാദമി ഫോർ സെക്യൂരിറ്റി ആൻഡ് പോലീസിംഗ് സയൻസസ് ഡയറക്ടർ ബ്രിഗേഡിയർ മുഹമ്മദ് ഹമദ് അൽ കഅബി, പോലീസ് ക്വാളിഫിക്കേഷൻ ഡിപ്പാർട്ട്മെന്റ് ആക്ടിങ് ഡയറക്ടർ കേണൽ ഡോ. മുബാറക് സലേം അൽ അമീരി എന്നിവരുടെ നേതൃത്വത്തിൽ നടന്ന ചടങ്ങിലാണ് ഉദ്യോഗസ്ഥർ പരിശീലനം പൂർത്തിയാക്കിയത്. ആധുനിക സുരക്ഷാ വെല്ലുവിളികളെ നേരിടാനും മികച്ച പ്രവർത്തനക്ഷമത ഉറപ്പാക്കാനും ഉയർന്ന യോഗ്യതയുള്ള ഉദ്യോഗസ്ഥരെ വാർത്തെടുക്കുന്നതിൽ അബുദാബി പോലീസ് നൽകുന്ന പ്രാധാന്യം ബ്രിഗേഡിയർ അൽ കഅബി എടുത്തുപറഞ്ഞു. അച്ചടക്കവും ഉത്തരവാദിത്തബോധവും കൈവിടാതെ രാജ്യത്തിന്റെ സുരക്ഷയ്ക്കായി ഒറ്റക്കെട്ടായി പ്രവർത്തിക്കാൻ അദ്ദേഹം വിജയികളെ ഓർമ്മിപ്പിച്ചു.