വിദ്യാർത്ഥികളെ എളുപ്പത്തിൽ ജയിപ്പിക്കുന്ന പരീക്ഷകൾക്കെതിരെ യുഎഇ

അബുദാബി : വിദ്യാർത്ഥികൾക്ക് എളുപ്പത്തിൽ പാസ്സാകാൻ പാകത്തിൽ പരീക്ഷകളും മൂല്യനിർണ്ണയങ്ങളും ക്രമീകരിക്കുന്ന സർവ്വകലാശാലകൾക്കെതിരെ കർശന നടപടിയെടുക്കുമെന്ന് യുഎഇ അക്കാദമിക് അക്രഡിറ്റേഷൻ കമ്മീഷൻ (CAA). അക്കാദമിക് നിലവാരവും അക്കാദമിക് തത്വങ്ങളും ഉറപ്പാക്കുന്നതിനായി തയാറാക്കിയ പുതിയ നിയന്ത്രണ ചട്ടക്കൂടിന്റെ ഭാഗമായാണ് ഈ നിർദ്ദേശം. ഉന്നത വിദ്യാഭ്യാസ സ്ഥാപനങ്ങളുടെ ലംഘനങ്ങളും പിഴകളും സംബന്ധിച്ച 2026-ലെ 143-ാം നമ്പർ ക്യാബിനറ്റ് പ്രമേയത്തിന്റെ വിശദാംശങ്ങൾ അബുദാബിയിൽ നടന്ന യോഗത്തിൽ അക്കാദമിക് അക്രഡിറ്റേഷൻ ഡയറക്ടർ പ്രൊഫ. അംജദ് ഖൻദിൽ വ്യക്തമാക്കി.
സെപ്റ്റംബർ 12 മുതൽ പ്രാബല്യത്തിൽ വരുന്ന പുതിയ നിയമപ്രകാരം, പരീക്ഷകളുടെ വിശ്വാസ്യത തകർക്കുകയോ അക്കാദമിക് തത്വങ്ങൾ ലംഘിക്കുകയോ ചെയ്യുന്ന സ്ഥാപനങ്ങൾക്ക് 500,000 ദിർഹം വരെ പിഴയും പുതിയ വിദ്യാർത്ഥികളുടെ അഡ്മിഷൻ തടയൽ ഉൾപ്പെടെയുള്ള അഡ്മിനിസ്ട്രേറ്റീവ് നടപടികളും നേരിടേണ്ടി വരും. ആർട്ടിഫിഷ്യൽ ഇന്റലിജൻസ് (AI) കാലഘട്ടത്തിൽ എഐ നിരോധിക്കുന്നതിന് പകരം, പരീക്ഷാ രീതികൾ കൂടുതൽ പ്രായോഗികവും അക്കാദമിക് മൂല്യമുള്ളതുമായി മാറ്റാൻ പ്രൊഫ. ഖൻദിൽ സർവ്വകലാശാലകളോട് ആഹ്വാനം ചെയ്തു.