പ്രതിഭകളെ വളർത്തിയെടുക്കാൻ കൈകോർത്ത് യുഎഇ; ഹംദാൻ ഫൗണ്ടേഷനും നോളജ് ഫണ്ടും പുതിയ പദ്ധതിയുമായി രംഗത്ത്

ദുബൈ : ദുബൈയിലെ സ്‌കൂളുകളിൽ പഠിക്കുന്ന പ്രതിഭാധനരായ (Gifted) വിദ്യാർത്ഥികളെ കണ്ടെത്താനും അവരുടെ കഴിവുകൾ വളർത്തിയെടുക്കാനുമായി ഹംദാൻ ബിൻ റാഷിദ് അൽ മക്തും ഫൗണ്ടേഷനും നോളജ് ഫണ്ട് എസ്റ്റാബ്ലിഷ്‌മെന്റും തമ്മിൽ ധാരണാപത്രം ഒപ്പുവെച്ചു. ഇതിന്റെ ഭാഗമായി ‘ഹംദാൻ ഗിഫ്റ്റഡ്‌നെസ് സ്കെയിൽ’ ഉപയോഗിച്ച് വിദ്യാർത്ഥികളുടെ കഴിവുകൾ ശാസ്ത്രീയമായി വിലയിരുത്തുകയും അധ്യാപകർക്ക് പ്രത്യേക പരിശീലനം നൽകുകയും ചെയ്യും. തിരഞ്ഞെടുക്കപ്പെടുന്ന മിടുക്കരായ കുട്ടികൾക്ക് അവരുടെ കഴിവുകൾ വികസിപ്പിക്കാൻ സഹായിക്കുന്ന പ്രത്യേക കോഴ്സുകളിൽ പ്രവേശനം നൽകും. ഭാവിയിലെ വിജ്ഞാനാധിഷ്ഠിത സമ്പദ്‌വ്യവസ്ഥയിലേക്ക് പുതിയ തലമുറയെ പ്രാപ്തരാക്കുകയാണ് ഈ പദ്ധതിയുടെ ലക്ഷ്യം.