ദുബായ് : ദുബായിൽ സ്വർണ്ണവിലയിൽ ഇടിവ് രേഖപ്പെടുത്തി. 22 കാരറ്റ് സ്വർണ്ണത്തിന്റെ വില ഗ്രാമിന് 500 ദിർഹത്തിന് താഴെയെത്തി. ദുബായ് ജ്വല്ലറി ഗ്രൂപ്പിന്റെ കണക്കുകൾ പ്രകാരം 24 കാരറ്റ് സ്വർണ്ണത്തിന് ഗ്രാമിന് 539.25 ദിർഹമാണ് വെള്ളിയാഴ്ചത്തെ നിരക്ക്. വ്യാഴാഴ്ച മാർക്കറ്റ് അവസാനിക്കുമ്പോൾ ഇത് 542 ദിർഹമായിരുന്നു (ഗ്രാമിന് 2.75 ദിർഹത്തിന്റെ കുറവ്). 22 കാരറ്റ് സ്വർണ്ണത്തിന് ഗ്രാമിന് 499.25 ദിർഹവും, 21 കാരറ്റിന് 478.75 ദിർഹവും, 18 കാരറ്റിന് 410.25 ദിർഹവും, 14 കാരറ്റിന് 320 ദിർഹവുമാണ് നിലവിലെ വില.
അന്താരാഷ്ട്ര വിപണിയിൽ സ്പോട്ട് ഗോൾഡ് വില ഔൺസിന് 0.5 ശതമാനം ഇടിഞ്ഞ് 4,470 ഡോളറിലെത്തി. വരാനിരിക്കുന്ന ദീപാവലി, ദസറ, നവരാത്രി ആഘോഷ വേളകൾക്ക് മുന്നോടിയായി സ്വർണ്ണവില കുറഞ്ഞത് ഉപഭോക്താക്കൾക്കും വ്യാപാരികൾക്കും ഒരുപോലെ ആശ്വാസമേകുന്നുണ്ട്. യുഎസ് നോൺ-ഫാം പെയ്‌റോൾ വിവരങ്ങളും പലിശനിരക്ക് സംബന്ധിച്ച ഫെഡറൽ റിസർവ് തീരുമാനങ്ങളും അന്താരാഷ്ട്ര വിപണിയിൽ എണ്ണവിലയിലുണ്ടാകുന്ന വ്യതിയാനങ്ങളുമാണ് സ്വർണ്ണവിലയെ സ്വാധീനിക്കുന്ന പ്രധാന ഘടകങ്ങളെന്ന് സാമ്പത്തിക വിദഗ്ദ്ധർ ചൂണ്ടിക്കാണിക്കുന്നു.
