silvya

അബുദാബി: മലയാളി ആരോഗ്യ സംരംഭകൻ ഡോ. ഷംഷീർ വയലിൽ ചെയർമാനും സിഇഒയുമായ യുഎഇയിലെ പ്രമുഖ ആരോഗ്യസേവന ദാതാവായ ബുർജീൽ ഹോൾഡിങ്സിന് ആഗോള സാമ്പത്തിക വിപണിയിൽ വൻ നേട്ടം. കമ്പനി ആദ്യമായി പുറത്തിറക്കിയ ‘സുക്കൂക്’ (ഇസ്ലാമിക് ബോണ്ട്) വഴി 4,708 കോടി രൂപ (500 മില്യൺ യുഎസ് ഡോളർ) വിജയകരമായി സമാഹരിച്ചു. അബുദാബി സെക്യൂരിറ്റീസ് എക്സ്ചേഞ്ചിൽ ലിസ്റ്റ് ചെയ്തിട്ടുള്ള ബുർജീൽ ഹോൾഡിങ്സിന്റെ ആകെ 14,124 കോടി രൂപയുടെ (1.5 ബില്യൺ യുഎസ് ഡോളർ) ബോണ്ട് പദ്ധതിയുടെ ഭാഗമായാണ് 5 വർഷത്തെ കാലാവധിയുള്ള സുക്കൂക് പുറത്തിറക്കിയത്. ഈ ബോണ്ടുകൾ വരും ദിവസങ്ങളിൽ ലണ്ടൻ സ്റ്റോക്ക് എക്സ്ചേഞ്ചിൽ വ്യാപാരത്തിനായി ലിസ്റ്റ് ചെയ്യും. മിഡിൽ ഈസ്റ്റ് നോർത്ത് ആഫ്രിക്ക (മെന) മേഖലയിലെ ഒരു ഹെൽത്ത്കെയർ കമ്പനി 2018-ന് ശേഷം പുറത്തിറക്കുന്ന ആദ്യ സുക്കൂക് ബോണ്ടാണിത് എന്ന പ്രത്യേകതയും ഇതിനുണ്ട്. സമീപകാലത്തുണ്ടായ പ്രാദേശിക പ്രതിസന്ധികൾക്കിടയിലും യുഎഇയിൽ നിന്ന് പുറത്തിറങ്ങുന്ന ആദ്യ കോർപ്പറേറ്റ് ബോണ്ടെന്ന നിലയിൽ വിപണിയുടെ കരുത്ത് തെളിയിക്കുന്നതാണ് ഡോ. ഷംഷീറിന്റെ ഈ നീക്കം.

ആഗോള, പ്രാദേശിക നിക്ഷേപകരിൽ നിന്ന് വൻ സ്വീകാര്യതയാണ് ബുർജീലിന്റെ ബോണ്ടിന് ലഭിച്ചത്. കമ്പനി ലക്ഷ്യമിട്ട തുകയുടെ 3.2 ഇരട്ടിയിലധികം, അതായത് 15,066 കോടി രൂപയുടെ (1.6 ബില്യൺ യുഎസ് ഡോളർ) നിക്ഷേപ താല്പര്യമാണ് വിപണിയിൽ നിന്ന് ഒഴുകിയെത്തിയത്. ബോണ്ട് വാങ്ങിയവരിൽ വലിയൊരു പങ്ക് അന്താരാഷ്ട്ര നിക്ഷേപകരാണ്. ആകെ അലോട്ട്മെന്റിന്റെ 61 ശതമാനവും അന്താരാഷ്ട്ര തലത്തിൽ നിന്നാണ്. ഇതിൽ യുകെ (34%), യുഎസ് ഓഫ്ഷോർ (24%), മറ്റ് ആഗോള വിപണികൾ (3%) എന്നിവ ഉൾപ്പെടുന്നു. ജിസിസി മേഖലയിൽ നിന്ന് 39% നിക്ഷേപകരും പങ്കാളികളായി. ഇത് യുഎഇ മൂലധന വിപണിയിലുള്ള ആഗോള വിശ്വാസ്യതയ്ക്ക് അടിവരയിടുന്നു. നിക്ഷേപകരുടെ ശക്തമായ താല്പര്യം മുൻനിർത്തി ബോണ്ടിന്റെ ലാഭവിഹിത നിരക്ക് 7 ശതമാനമായും യീൽഡ് 7.125 ശതമാനമായും നിജപ്പെടുത്താൻ ബുർജീലിനായി. ജിസിസി മേഖലയിലെ സ്വകാര്യ കോർപ്പറേറ്റ് ഇഷ്യൂവറിന് 2020-ന് ശേഷം ലഭിക്കുന്ന ഏറ്റവും കുറഞ്ഞ യീൽഡ് നിരക്കാണിത്. അന്താരാഷ്ട്ര റേറ്റിങ് ഏജൻസികളായ എസ് ആൻഡ് പി (S&P) കമ്പനിക്ക് ‘BB+’ റേറ്റിങ്ങും മൂഡീസ് (Moody’s) ‘Ba2’ റേറ്റിങ്ങുമാണ് നൽകിയിട്ടുള്ളത്.

ലഭിച്ച തുക നിലവിലുള്ള ബാധ്യതകൾ തീർക്കാനും ഗ്രൂപ്പിന്റെ തന്ത്രപ്രധാനമായ വികസന പ്രവർത്തനങ്ങൾക്കുമായി ഉപയോഗിക്കുമെന്ന് കമ്പനി വ്യക്തമാക്കി. ഒപ്പം, അത്യാധുനിക ചികിത്സാരീതികൾ, മെഡിക്കൽ ഗവേഷണം, നിർമ്മിത ബുദ്ധി (AI), സാങ്കേതികവിദ്യകളുടെ വികസനം എന്നിവയ്ക്കായി ഈ മൂലധനം വിനിയോഗിക്കും. കമ്പനിയുടെ ബിസിനസ് തന്ത്രങ്ങൾക്കും സാമ്പത്തിക ഭദ്രതയ്ക്കും ആഗോള നിക്ഷേപകർ നൽകിയ വലിയ അംഗീകാരമാണിതെന്ന് ബുർജീൽ ഹോൾഡിങ്സ് ചെയർമാൻ ഡോ. ഷംഷീർ വയലിൽ വ്യക്തമാക്കി. ആഗോള തലത്തിൽ നിന്ന് വലിയ തോതിൽ മൂലധനം സമാഹരിക്കാൻ കഴിഞ്ഞത് ബുർജീലിന്റെ വിശ്വസ്തതയ്ക്ക് അടിവരയിടുന്നുവെന്നും, ആരോഗ്യസംരക്ഷണം അടുത്ത തലത്തിലേക്ക് വികസിപ്പിക്കാൻ ഈ നേട്ടം കമ്പനിക്ക് വലിയ സാമ്പത്തിക സ്വാതന്ത്ര്യം നൽകുമെന്നും ഡോ. ഷംഷീർ കൂട്ടിച്ചേർത്തു.

സിറ്റി ബാങ്ക്, എമിറേറ്റ്സ് എൻബിഡി കാപ്പിറ്റൽ, ഫസ്റ്റ് അബുദാബി ബാങ്ക് എന്നിവയായിരുന്നു ബോണ്ട് ഇഷ്യൂവിന്റെ ആഗോള കോർഡിനേറ്റർമാർ. അബുദാബി കൊമേഴ്സ്യൽ ബാങ്ക്, അബുദാബി ഇസ്ലാമിക് ബാങ്ക്, ദുബായ് ഇസ്ലാമിക് ബാങ്ക്, റാക് ബാങ്ക്, ഷാർജ ഇസ്ലാമിക് ബാങ്ക് എന്നിവർ ലീഡ് മാനേജർമാരായും പ്രവർത്തിച്ചു. യുഎഇ, ഒമാൻ, സൗദി അറേബ്യ എന്നീ രാജ്യങ്ങളിലായി 20 ആശുപത്രികളും 41 മെഡിക്കൽ സെന്ററുകളും ഉൾപ്പെടെ 89 സ്ഥാപനങ്ങളാണ് ഡോ. ഷംഷീർ വയലിലിന്റെ നേതൃത്വത്തിലുള്ള ബുർജീൽ ഹോൾഡിങ്സിന് കീഴിൽ നിലവിൽ വിജയകരമായി പ്രവർത്തിക്കുന്നത്.

അബുദാബി, യു.എ.ഇ; മെയ് 19: പ്രമുഖ ആഗോള മാധ്യമമായ ദി വാഷിംഗ്ടൺ പോസ്റ്റിന്റെ ഉപദേശക വിഭാഗമായ ‘വാഷിംഗ്ടൺ പോസ്റ്റ് ഇന്റലിജൻസ്’, തങ്ങളുടെ ആർട്ടിഫിഷ്യൽ ഇന്റലിജൻസ് & ടെക്നോളജി കൗൺസിലിലേക്ക് ലുലു ഫിനാൻഷ്യൽ ഹോൾഡിംഗ്സ് മാനേജിംഗ് ഡയറക്ടർ അദീബ് അഹമ്മദിനെ തിരഞ്ഞെടുത്തു.

ആർട്ടിഫിഷ്യൽ ഇന്റലിജൻസ് (AI), ഡിജിറ്റൽ പരിവർത്തനം എന്നിവയിലൂടെ ആഗോള നയരൂപീകരണത്തിനും വ്യവസായ നവീകരണത്തിനുമായി അന്താരാഷ്ട്ര തലത്തിൽ പ്രവർത്തിക്കുന്ന പ്രമുഖരുടെ കൂട്ടായ്മയാണിത്. ലോകമെമ്പാടുമുള്ള പ്രമുഖ ബിസിനസ്സ് മേധാവികളും സാങ്കേതിക വിദഗ്ധരുമാണ് ഈ കൗൺസിലിൽ ഉള്ളത്.

ഗൾഫ് മേഖലയിൽ നിന്ന് ഈ കൗൺസിലിലേക്ക് തിരഞ്ഞെടുക്കപ്പെടുന്ന ആദ്യത്തെ ബിസിനസ്സ് നേതാക്കളിൽ ഒരാളാണ് അദീബ് അഹമ്മദ്. AI, ഫിൻടെക് എന്നിവയുടെ ആഗോള കേന്ദ്രമായി അതിവേഗം വളരുന്ന ഗൾഫ് രാജ്യങ്ങളുടെ കാഴ്ചപ്പാടുകളും അനുഭവങ്ങളും അന്താരാഷ്ട്ര തലത്തിൽ പങ്കുവെക്കാൻ അദ്ദേഹത്തിന്റെ പങ്കാളിത്തം സഹായിക്കും.

അദീബ് അഹമ്മദിന്റെ നേതൃത്വത്തിൽ ലുലു ഫിനാൻഷ്യൽ ഹോൾഡിംഗ്സ് ജി.സി.സി, ഇന്ത്യൻ ഉപഭൂഖണ്ഡം, ഏഷ്യാ പസഫിക് മേഖലകളിൽ അതിവേഗം വളരുന്ന മുൻനിര സാമ്പത്തിക സേവന ഗ്രൂപ്പുകളിലൊന്നായി മാറിയിട്ടുണ്ട്. ക്രോസ്-ബോർഡർ പേയ്‌മെന്റുകൾ, ഫിൻടെക് ഇന്നൊവേഷൻ, ഡിജിറ്റൽ സാമ്പത്തിക ഉൾപ്പെടുത്തൽ എന്നിവയിലാണ് കമ്പനി പ്രധാനമായും ശ്രദ്ധ കേന്ദ്രീകരിക്കുന്നത്.

നിയമനത്തെ കുറിച്ച് അദീബ് അഹമ്മദ് പ്രതികരിച്ചു: “മികച്ച സൗകര്യങ്ങളും ആഗോള ബന്ധങ്ങളും ഒത്തുചേരുന്ന ഇടങ്ങളായിരിക്കും ആർട്ടിഫിഷ്യൽ ഇന്റലിജൻസിന്റെ ഭാവി നിശ്ചയിക്കുക. ദീർഘവീക്ഷണമുള്ള ഭരണാധികാരികളുടെ പിന്തുണയോടെ ജി.സി.സി ഉൾപ്പെടെയുള്ള മിഡിൽ ഈസ്റ്റ് മേഖല ഈ രംഗത്ത് അതിവേഗം മുന്നേറുകയാണ്. ആഗോള ബിസിനസിന്റെയും സാമ്പത്തിക രംഗത്തിന്റെയും കേന്ദ്രമായ ഈ പ്രദേശത്തുനിന്നുള്ള അനുഭവങ്ങൾ ഈ കൗൺസിലിൽ പങ്കുവെക്കാൻ സാധിക്കുന്നതിൽ വലിയ സന്തോഷമുണ്ട്.”