ദുബായ് : സ്വർണ്ണവിലയിലുണ്ടായ നേരിയ കുറവ് യുഎഇയിലെ ഉപഭോക്താക്കൾക്കും സഞ്ചാരികൾക്കും ആശ്വാസമാകുന്നു. ചൊവ്വാഴ്ച രാവിലെ ദുബായ് വിപണിയിൽ സ്വർണ്ണവില ഗ്രാമിന് 568 ദിർഹത്തിന് താഴെയെത്തി. അന്താരാഷ്ട്ര വിപണിയിൽ സ്വർണ്ണവില കുറഞ്ഞതാണ് പ്രാദേശിക വിപണിയിലും പ്രതിഫലിച്ചത്.
ചൊവ്വാഴ്ച രാവിലെ ദുബായ് വിപണി തുറന്നപ്പോൾ 24 കാരറ്റ് സ്വർണ്ണത്തിന് ഗ്രാമിന് 567.50 ദിർഹമായാണ് രേഖപ്പെടുത്തിയത്. തിങ്കളാഴ്ച വൈകുന്നേരം ഇത് 570.75 ദിർഹമായിരുന്നു. 22 കാരറ്റ് സ്വർണ്ണത്തിന് ഗ്രാമിന് 525.50 ദിർഹമായും കുറഞ്ഞു (തിങ്കളാഴ്ച 528.50 ആയിരുന്നു).
അമേരിക്കയിലെ പണപ്പെരുപ്പ നിരക്കുകൾ പുറത്തുവരാനിരിക്കുന്നതും മിഡിൽ ഈസ്റ്റിലെ രാഷ്ട്രീയ സാഹചര്യങ്ങളും ആഗോള വിപണിയിൽ സ്വർണ്ണവിലയിൽ മാറ്റങ്ങൾ വരുത്തിയിട്ടുണ്ട്. വിവാഹ ആവശ്യങ്ങൾക്കും വേനൽക്കാല യാത്രകൾക്കുമായി സ്വർണ്ണം വാങ്ങാൻ പദ്ധതിയിടുന്നവർക്ക് ഈ വിലക്കുറവ് മികച്ച അവസരമാണ് നൽകുന്നത്. ആഗോള വിപണിയുമായി നേരിട്ട് ബന്ധപ്പെട്ടു കിടക്കുന്നതിനാൽ അന്താരാഷ്ട്ര തലത്തിലുണ്ടാകുന്ന ചെറിയ മാറ്റങ്ങൾ പോലും ദുബായ് വിപണിയിൽ ഉടൻ പ്രതിഫലിക്കാറുണ്ട്.