ലണ്ടൻ: അന്താരാഷ്ട്ര സാമ്പത്തിക വിപണിയിൽ വൻ ശ്രദ്ധ നേടിയ 4,708 കോടി രൂപയുടെ പ്രഥമ സുക്കൂക് ബോണ്ട് സമാഹരണത്തിന് പിന്നാലെ, പ്രമുഖ മലയാളി ആരോഗ്യ സംരംഭകൻ ഡോ. ഷംഷീർ വയലിലിന്റെ നേതൃത്വത്തിലുള്ള ബുർജീൽ ഹോൾഡിങ്സ് ലണ്ടൻ സ്റ്റോക്ക് എക്സ്ചേഞ്ചിന്റെ ഇന്റർനാഷണൽ സെക്യൂരിറ്റീസ് മാർക്കറ്റിൽ വ്യാപാരം ആരംഭിച്ചു. ലണ്ടൻ സ്റ്റോക്ക് എക്സ്ചേഞ്ചിന്റെ ചരിത്രപ്രസിദ്ധമായ ‘മാർക്കറ്റ് ഓപ്പൺ’ ചടങ്ങോടെയാണ് ഈ ഇസ്ലാമിക് ബോണ്ട് ഔദ്യോഗികമായി ട്രേഡിങ് ആരംഭിച്ചത്. മിഡിൽ ഈസ്റ്റ് നോർത്ത് ആഫ്രിക്ക (മെന) മേഖലയിൽ നിന്നുള്ള ഒരു ഹെൽത്ത്കെയർ കമ്പനി 2018-ന് ശേഷം പുറത്തിറക്കുന്ന ആദ്യ സുക്കൂക് ബോണ്ടാണിത്. ലക്ഷ്യമിട്ട തുകയുടെ 3.2 ഇരട്ടിയിലധികം (15,066 കോടി രൂപ) നിക്ഷേപ താല്പര്യം ആകർഷിച്ച ഈ ബോണ്ടിലൂടെ ലഭ്യമാകുന്ന തുക, യുഎഇ, ഒമാൻ, സൗദി അറേബ്യ എന്നീ രാജ്യങ്ങളിലായി 89 സ്ഥാപനങ്ങളുള്ള ബുർജീൽ ഗ്രൂപ്പിന്റെ കടബാധ്യതകൾ തീർക്കാനും അത്യാധുനിക ചികിത്സാരീതികൾ, നിർമിത ബുദ്ധി (AI) ഉൾപ്പെടെയുള്ള സാങ്കേതികവിദ്യകളുടെ വികസനത്തിനുമായി വിനിയോഗിക്കുമെന്ന് ചെയർമാനും സിഇഒയുമായ ഡോ. ഷംഷീർ വയലിൽ വ്യക്തമാക്കി.
82