Raneesha Razak

യുഎഇ : ബലിപെരുന്നാൾ (Eid Al Adha) ആഘോഷങ്ങൾ വരവേൽക്കാൻ യുഎഇയിലെ നഗരങ്ങൾ ഒരുങ്ങി. ഇതിന്റെ ഭാഗമായി രാജ്യത്തെ പ്രധാന വീഥികളിലും പൊതുസ്ഥലങ്ങളിലും മൂവായിരത്തോളം വർണ്ണവിളക്കുകളും സ്വാഗത ബോർഡുകളും സ്ഥാപിച്ചു. അതോടൊപ്പം പെരുന്നാൾ അവധിക്കാലത്തെ തിരക്ക് നിയന്ത്രിക്കാൻ വിപുലമായ മുൻകരുതലുകളും മുനിസിപ്പാലിറ്റികൾ സ്വീകരിച്ചിട്ടുണ്ട്.

അൽ ഐൻ സിറ്റി മുനിസിപ്പാലിറ്റി നഗരത്തിലുടനീളം ഏകദേശം 1,400 എൽഇഡി (LED) ലൈറ്റിംഗ് യൂണിറ്റുകളാണ് സ്ഥാപിച്ചിട്ടുള്ളത്. 98 കിലോമീറ്റർ നീളത്തിൽ പ്രധാന റോഡുകളിലും ജംഗ്ഷനുകളിലും പരിസ്ഥിതി സൗഹൃദ സാങ്കേതികവിദ്യയിലുള്ള ലൈറ്റുകളാണ് ഒരുക്കിയിരിക്കുന്നത്. അൽ ഐനിന്റെ പ്രകൃതിഭംഗിയും പരമ്പരാഗത പൈതൃകവും വിളിച്ചോതുന്ന രൂപകൽപ്പനയാണ് ഇതിനായി ഉപയോഗിച്ചിരിക്കുന്നത്. അജ്മാനിലും സമാനമായ രീതിയിൽ തെരുവുകളും പാർക്കുകളും പൊതുചത്വരങ്ങളും 1,500 ഓളം പ്രകാശപൂരിതമായ പാനലുകൾ കൊണ്ട് അലങ്കരിച്ചിട്ടുണ്ട്.

പെരുന്നാൾ പ്രമാണിച്ച് ഷാർജയിലെ ദിബ്ബ അൽ ഹിസ്ൻ (Dibba Al Hisn) മുനിസിപ്പാലിറ്റി കടുത്ത സുരക്ഷാ-ആരോഗ്യ മുൻകരുതലുകൾ പ്രഖ്യാപിച്ചു. പെരുന്നാൾ ബലി കർമ്മങ്ങൾക്കായി മുനിസിപ്പൽ കശാപ്പുശാലകളുടെ (Slaughterhouses) ശേഷി വർദ്ധിപ്പിച്ചിട്ടുണ്ട്. മൃഗഡോക്ടർമാരുടെ കർശന മേൽനോട്ടത്തിലായിരിക്കും ഇവിടുത്തെ പ്രവർത്തനങ്ങൾ. ലൈസൻസില്ലാത്ത അറവുകാരെ സമീപിക്കരുതെന്നും അംഗീകൃത കേന്ദ്രങ്ങൾ മാത്രം ഉപയോഗിക്കണമെന്നും അധികൃതർ ജനങ്ങളോട് ആവശ്യപ്പെട്ടു. പെരുന്നാളിന് മുന്നോടിയായി മാർക്കറ്റുകൾ, ഭക്ഷണശാലകൾ, ബാർബർ ഷോപ്പുകൾ, ബ്യൂട്ടി സലൂണുകൾ എന്നിവിടങ്ങളിൽ പരിശോധന കർശനമാക്കിയിട്ടുണ്ട്.