ദുബായ് പ്രൈം ഹോസ്പിറ്റലിൽ അപൂർവ ശസ്ത്രക്രിയ

ദുബായ് : ദുബായിലെ പ്രൈം ഹോസ്പിറ്റലിൽ അത്യാധുനിക 3D സാങ്കേതികവിദ്യയുടെ സഹായത്തോടെ 12 മണിക്കൂർ നീണ്ട സങ്കീർണ്ണമായ താടിയെല്ല് പുനർനിർമ്മാണ ശസ്ത്രക്രിയ വിജയകരമായി പൂർത്തിയാക്കി. 15 വർഷത്തിലേറെയായി താടിയെല്ലിലെ ആവർത്തിച്ചുണ്ടാകുന്ന ട്യൂമർ ബാധിച്ച് ദുരിതമനുഭവിച്ചിരുന്ന 37 കാരനായ ഫിലിപ്പീൻസ് സ്വദേശിക്കാണ് ഈ അപൂർവ ശസ്ത്രക്രിയയിലൂടെ പുതിയ ജീവിതം ലഭിച്ചത്. രോഗിയുടെ താടിയെല്ലിന്റെ ഘടനയ്ക്ക് അനുയോജ്യമായ രീതിയിൽ പ്രത്യേകം രൂപകൽപ്പന ചെയ്ത 3D പ്രിന്റഡ് ടൈറ്റാനിയം ഇംപ്ലാന്റ് ഉപയോഗിച്ചാണ് ഡോക്ടർമാർ ഈ പുനർനിർമ്മാണം നടത്തിയത്. വിവിധ വിഭാഗങ്ങളിലെ വിദഗ്ധരായ സർജന്മാർ ഒത്തുചേർന്ന മെഡിക്കൽ സംഘമാണ് ഈ സങ്കീർണ്ണ ദൗത്യത്തിന് നേതൃത്വം നൽകിയത്. രോഗം പൂർണ്ണമായി ഭേദമാക്കുന്നതിനൊപ്പം രോഗിയുടെ മുഖത്തിന്റെ സ്വാഭാവിക ഘടനയും താടിയെല്ലിന്റെ പ്രവർത്തനക്ഷമതയും വീണ്ടെടുക്കാൻ ഈ അത്യാധുനിക ശസ്ത്രക്രിയയിലൂടെ സാധിച്ചതായി ആശുപത്രി അധികൃതർ വ്യക്തമാക്കി.