ടൈംസ് വേൾഡ് യൂണിവേഴ്‌സിറ്റി റാങ്കിംഗിൽ മിന്നുന്ന നേട്ടവുമായി യുഎഇ യൂണിവേഴ്‌സിറ്റി

ഷാർജ : ടൈംസ് ഹയർ എഡ്യൂക്കേഷൻ (THE) വേൾഡ് യൂണിവേഴ്‌സിറ്റി റാങ്കിംഗ്സ് 2027-ൽ മിന്നുന്ന നേട്ടവുമായി യുണൈറ്റഡ് അറബ് എമിറേറ്റ്സ് യൂണിവേഴ്സിറ്റി (UAEU). രാജ്യത്തെ പ്രമുഖ സർവ്വകലാശാലയായ ഖലീഫ യൂണിവേഴ്‌‌സിറ്റിക്കൊപ്പം യുഎഇയിൽ സംയുക്തമായി ഒന്നാം സ്ഥാനവും ആഗോളതലത്തിൽ 235-ാം സ്ഥാനവും യുഎഇയു കരസ്ഥമാക്കി. അക്കാദമിക്, ഗവേഷണ രംഗങ്ങളിൽ വൻ കുതിച്ചുചാട്ടം നടത്തുന്ന യുഎഇ യൂണിവേഴ്‌സിറ്റിയുടെ ദീർഘകാല പ്രപ്രവർത്തനങ്ങൾക്കുള്ള അംഗീകാരമാണിതെന്ന് സർവ്വകലാശാല അധികൃതർ വ്യക്തമാക്കി.
യൂണിവേഴ്‌സിറ്റി സ്ഥാപനത്തിന്റെ സുവർണ്ണ ജൂബിലി (50 വർഷം) ആഘോഷിക്കുന്ന വേളയിലാണ് ഈ സുപ്രധാന നേട്ടം എന്ന സവിശേഷതയുമുണ്ട്. 1976-ൽ രാജ്യത്തെ ആദ്യ ദേശീയ സർവ്വകലാശാലയായി ആരംഭിച്ച യുഎഇയു, അഞ്ച് പതിറ്റാണ്ടുകളായി ഗവേഷണം, നൂതന സാങ്കേതികവിദ്യ, ദേശീയ കഴിവുകളുടെ വികസനം എന്നിവയിൽ വലിയ പങ്കാണ് വഹിക്കുന്നത്. 118 രാജ്യങ്ങളിൽ നിന്നുള്ള 2,297 സർവ്വകലാശാലകളെ വിലയിരുത്തി തയ്യാറാക്കിയ പട്ടികയിൽ ബോധന നിലവാരം, ഗവേഷണ അന്തരീക്ഷം, ആഗോള കാഴ്ചപ്പാട് എന്നിവ മുൻനിർത്തിയാണ് മികച്ച സ്ഥാനം നൽകിയത്. ഈ വിജയം രാജ്യത്തിന്റെ ഭാവി മുൻഗണനകൾക്ക് കരുത്തേകാൻ കൂടുതൽ നിക്ഷേപം നടത്താൻ പ്രചോദനമാണെന്ന് യുഎഇ പ്രസിഡന്റിന്റെ സാംസ്കാരിക ഉപദേഷ്ടാവും യുഎഇയു ചാൻസലറുമായ സാക്കി അൻവർ നുസൈബ പറഞ്ഞു.