തൊഴിലാളികളുടെ സുരക്ഷയ്ക്കായി ‘സൺ പ്രൊട്ടക്ഷൻ’ പദ്ധതിയുമായി ദുബായ് പൊലീസ്

ദുബായ് : കടുത്ത ചൂടിൽ ജോലി ചെയ്യുന്ന തൊഴിലാളികൾക്ക് ആരോഗ്യ സംരക്ഷണവും സുരക്ഷയും ഉറപ്പാക്കുന്നതിനായി ‘സൺ പ്രൊട്ടക്ഷൻ’ (Sun Protection) പദ്ധതിയുമായി ദുബായ് പൊലീസ്. കാമ്പെയ്ന്റെ ഭാഗമായി ഇതുവരെ 120-ഓളം തൊഴിലാളികളിലേക്ക് സുരക്ഷാ സന്ദേശങ്ങളും മുൻകരുതലുകളും എത്തിച്ചു. ഔട്ട്ഡോർ ജോലികളിൽ ഏർപ്പെടുന്ന തൊഴിലാളികൾ നിർബന്ധമായും പാലിക്കേണ്ട കാര്യങ്ങളായ ഇടയ്ക്കിടെ വെള്ളം കുടിക്കുക, കൃത്യമായ ഇടവേളകളിൽ വിശ്രമിക്കുക, വെയിലിൽ നിന്നുള്ള മറ്റ് പ്രതിരോധ മാർഗ്ഗങ്ങൾ സ്വീകരിക്കുക എന്നിവയെക്കുറിച്ച് കാമ്പെയ്നിൽ ബോധവത്കരണം നൽകി. ദുബായ് പൊലീസിന്റെ കറക്ഷണൽ ആൻഡ് പ്യൂണിറ്റീവ് ഇൻസ്റ്റിറ്റ്യൂഷൻസും പോസിറ്റീവ് സ്പിരിറ്റ് കൗൺസിലും സംയുക്തമായാണ് ഈ സത്പ്രവൃത്തി സംഘടിപ്പിച്ചത്. ഉയർന്ന താപനിലയുള്ള സമയങ്ങളിൽ തൊഴിലാളികളുടെ ആരോഗ്യവും ജീവിത നിലവാരവും മെച്ചപ്പെടുത്തുക എന്നതാണ് ഇതിലൂടെ ലക്ഷ്യമിടുന്നത്.