ദുബായിലേക്കുള്ള സർവീസുകൾ ഒക്ടോബറിൽ പുനരാരംഭിക്കാൻ എയർ അസ്താന

ദുബായ് : കസാക്കിസ്ഥാനിലെ പ്രമുഖ എയർലൈൻ കമ്പനിയായ എയർ അസ്താന (Air Astana) തങ്ങളുടെ പ്രധാന കേന്ദ്രങ്ങളായ അൽമാട്ടി, അസ്താന എന്നിവിടങ്ങളിൽ നിന്ന് ദുബായിലേക്കുള്ള വിമാന സർവീസുകൾ ഒക്ടോബർ ആദ്യം മുതൽ പുനരാരംഭിക്കുന്നു. മേഖലയിലെ സുരക്ഷാ ആശങ്കകളെ തുടർന്ന് ജൂലൈ മുതൽ നിർത്തിവെച്ചിരുന്ന സർവീസുകളാണ് എയർലൈൻ പുനരാരംഭിക്കുന്നത്. അൽമാട്ടിയിൽ നിന്നുള്ള വിമാന സർവീസുകൾ ഒക്ടോബർ 1 മുതലും അസ്താനയിൽ നിന്നുള്ള സർവീസുകൾ ഒക്ടോബർ 2 മുതലും ആരംഭിക്കും.
ഒക്ടോബർ മാസത്തിൽ ഘട്ടംഘട്ടമായായിരിക്കും വിമാനങ്ങളുടെ എണ്ണം വർദ്ധിപ്പിക്കുക. അൽമാട്ടി-ദുബായ് റൂട്ടിൽ തുടക്കത്തിൽ ആഴ്ചയിൽ 4 സർവീസുകൾ വീതവും ഒക്ടോബർ അവസാനത്തോടെ ഇത് ആഴ്ചയിൽ 12 സർവീസുകളായും ഉയർത്തും. അസ്താനയിൽ നിന്നുള്ള സർവീസുകൾ ആഴ്ചയിൽ 3 എന്നതിൽ നിന്ന് മാസാവസാനത്തോടെ 10 ആയി ഉയർത്താനാണ് കമ്പനി ലക്ഷ്യമിടുന്നത്. ബോയിംഗ് 767-300 വിമാനങ്ങൾ ഉപയോഗിച്ചായിരിക്കും തുടക്കത്തിൽ ദുബായ് ഇന്റർനാഷണൽ എയർപോർട്ട് ടെർമിനൽ 1 കേന്ദ്രീകരിച്ച് സർവീസുകൾ നടത്തുക.