അപൂർവ രോഗചികിത്സയിലും ജീൻ തെറാപ്പിയിലും ആഗോള മെഡിക്കൽ ടൂറിസം കേന്ദ്രമായി ദുബായ്

ദുബായ് : സാധാരണ മെഡിക്കൽ ടൂറിസം രീതികളിൽ നിന്ന് മാറി, അപൂർവ ജനിതക രോഗങ്ങൾക്കും (Rare and Complex Diseases) ജീൻ തെറാപ്പി ചികിത്സകൾക്കുമുള്ള ആഗോള കേന്ദ്രമായി ദുബായ് അതിവേഗം മാറിക്കൊണ്ടിരിക്കുകയാണ്. അത്യാധുനിക സാങ്കേതികവിദ്യ, ലോകോത്തര ഡോക്ടർമാരുടെ സേവനം, മറ്റ് രാജ്യങ്ങളിൽ ലഭ്യമാകാത്ത നൂതന ജീൻ തെറാപ്പി ചികിത്സകൾ എന്നിവയാണ് വിവിധ രാജ്യങ്ങളിൽ നിന്നുള്ള രോഗികളെ ദുബായിലേക്ക് ആകർഷിക്കുന്നത്.
യുഎഇയിലെ പ്രമുഖ ആശുപത്രി ശൃംഖലയായ മെഡ്‌കെയർ (Medcare Hospitals) മാത്രം സ്പൈനൽ മസ്കുലാർ അട്രോഫി (SMA), ഡുഷെൻ മസ്കുലാർ ഡിസ്ട്രോഫി (DMD) എന്നീ അപൂർവ രോഗങ്ങളാൽ ബുദ്ധിമുട്ടുന്ന 280-ഓളം അന്താരാഷ്ട്ര രോഗികളെയാണ് ഇതുവരെ ചികിത്സിച്ചത്. മിഡിൽ ഈസ്റ്റ്, യൂറോപ്പ്, സെൻട്രൽ ഏഷ്യ, ദക്ഷിണേഷ്യ എന്നിവിടങ്ങളിലെ മുപ്പതിലധികം രാജ്യങ്ങളിൽ നിന്നുള്ള രോഗികളാണ് ഇവിടേക്ക് എത്തിയിട്ടുള്ളത്. ഓങ്കോളജി, കാർഡിയാക്, ന്യൂറോ സർജറി, ജീൻ തെറാപ്പി, ഓർത്തോപീഡിക് മേഖലകളിൽ അത്യാധുനിക പരിചരണം നൽകുന്നതിലൂടെ ആഗോള ഹെൽത്ത്‌കെയർ ഹബ്ബായി ദുബായ് വളരുകയാണ്.