ദുബായ് : 2026-27 പുതിയ അധ്യയന വർഷം ആരംഭിച്ചതോടെ വിദ്യാർത്ഥികളുടെ വസ്ത്രധാരണം, ഹെയർസ്റ്റൈൽ, ആഹാരക്രമം എന്നിവയിൽ കർശന മാർഗ്ഗനിർദ്ദേശങ്ങളുമായി യുഎഇയിലെ സ്കൂളുകൾ. വിദ്യാർത്ഥികളിൽ കൃത്യമായ അച്ചടക്കം വളർത്തുന്നതിനും ആരോഗ്യകരമായ പഠനാന്തരീക്ഷം ഒരുക്കുന്നതിനുമായി ടാറ്റൂ, അനുയോജ്യമല്ലാത്ത ട്രെൻഡി ഹെയർസ്റ്റൈലുകൾ, ഹൂഡികൾ (Hoodies), എനർജി ഡ്രിങ്കുകൾ എന്നിവയ്ക്ക് വിവിധ സ്കൂളുകളിൽ വിലക്കേർപ്പെടുത്തിയിട്ടുണ്ട്. ശിക്ഷാനടപടി എന്നതിലുപരി വിദ്യാർത്ഥികളുടെ സമഗ്രമായ സുരക്ഷിതത്വവും ആരോഗ്യവും മുൻനിർത്തിയാണ് ഈ നടപടിയെന്ന് സ്കൂൾ അധികൃതർ വ്യക്തമാക്കി.
തലമുടിയുടെ ചില ഭാഗങ്ങൾ മാത്രം വടിക്കുന്ന രീതിയിലുള്ള മോഡേൺ ഹെയർസ്റ്റൈലുകൾക്കും ആൺകുട്ടികൾ മുടി നീട്ടി വളർത്തുന്നതിനുമാണ് പ്രധാനമായും നിയന്ത്രണമുള്ളത്. കൂടാതെ, സ്കൂൾ പരിസരത്തും ക്ലാസ്സ് മുറികളിലും ഹൂഡികൾ ധരിക്കുന്നതും തടഞ്ഞിട്ടുണ്ട്. അതോടൊപ്പം ക്യാംപസിലേക്ക് കൊണ്ടുവരുന്ന ഭക്ഷണ സാധനങ്ങളിൽ കഫീൻ അടങ്ങിയ എനർജി ഡ്രിങ്കുകൾക്ക് പൂർണ്ണ വിലക്കേർപ്പെടുത്തി. അച്ചടക്കവും തുല്യതയും പോഷിപ്പിക്കുന്നതിനും കുട്ടികളുടെ ആരോഗ്യം സംരക്ഷിക്കുന്നതിനുമാണ് ഇത്തരം നയങ്ങൾ നടപ്പിലാക്കുന്നതെന്ന് ക്രീഡൻസ് ഹൈസ്കൂൾ പ്രിൻസിപ്പൽ ദീപിക ഥാപ്പർ സിംഗ് അറിയിച്ചു.
39