അബുദാബി : പോപ്പ് കൾച്ചർ പ്രേമികളുടെയും ആനിമെ ആരാധകരുടെയും കാത്തിരിപ്പിന് വിരാമമിട്ട് മിഡിൽ ഈസ്റ്റ് ഫിലിം & കോമിക് കോൺ (MEFCC) 2026-ന് അബുദാബി അഡ്നെക് (ADNEC) സെന്ററിൽ ആവേശകരമായ തുടക്കം. സെപ്റ്റംബർ 11 മുതൽ 13 വരെയാണ് മൂന്ന് ദിവസം നീണ്ടുനിൽക്കുന്ന ഈ അന്താരാഷ്ട്ര കൺവെൻഷൻ നടക്കുന്നത്. സാധാരണ ഏപ്രിൽ മാസങ്ങളിൽ നടക്കാറുള്ള മേള ചില പ്രാദേശിക കാരണങ്ങളാൽ വൈകിയെങ്കിലും, കൂടുതൽ തയ്യാറെടുപ്പുകളോടെയാണ് ലോകമെമ്പാടുമുള്ള ആരാധകർ ഇത്തവണ എത്തിയത്.
ഹഗ്വാർട്ട്സ്, ഡ്രാമ, പോക്കിമോൻ തുടങ്ങി വിവിധ ജനപ്രിയ കഥാപാത്രങ്ങളുടെ വേഷപ്പകർച്ചയിലെത്തിയ (Cosplay) പതിനായിരക്കണക്കിന് ആളുകളാണ് പ്രദർശന ഹാളുകളിൽ നിറഞ്ഞത്. ആർട്ടിസ്റ്റ് ആലി, ഗെയിമിങ് സോൺ, ടേബിൾടോപ് ഏരിയ, തത്സമയ പ്രദർശനങ്ങൾ എന്നിവയാണ് പ്രധാന ആകർഷണങ്ങൾ. ജോൺ സീന, സിമു ലിയു, മക്കെൻയു, ചാരിത്ര ചന്ദ്രൻ, പോം ക്ലെമെന്റീഫ് തുടങ്ങിയ പ്രമുഖ താരങ്ങളുമായി സംവദിക്കാനും ഫോട്ടോയെടുക്കാനും മേളയിൽ അവസരമുണ്ട്.
കുട്ടികളും മുതിർന്നവരും ഒരുപോലെ എത്തുന്ന ഈ കൺവെൻഷൻ കുടുംബങ്ങൾ തമ്മിലുള്ള ബന്ധം ശക്തമാക്കാനുള്ള ഒരു മികച്ച ഇടം കൂടിയായി മാറിയിട്ടുണ്ടെന്ന് പങ്കെടുത്തവർ അഭിപ്രായപ്പെട്ടു. ടിക്കറ്റുകളെല്ലാം മുൻകൂട്ടി വിറ്റഴിഞ്ഞ മേളയിൽ വൈവിധ്യമാർന്ന ഭക്ഷണശാലകളും പുസ്തക കൈമാറ്റത്തിനായി ‘ബുക്ക്‌വേം ലോഞ്ചും’ ഒരുക്കിയിട്ടുണ്ട്.
12
previous post