ദുബായ്: കായികമേഖലയിൽ നിരോധിത മരുന്നുകളുടെ ഉപയോഗം തടയുന്നതിനും ശുദ്ധമായ കായിക സംസ്കാരം പ്രോത്സാഹിപ്പിക്കുന്നതിനുമായി വിപുലമായ ബോധവൽക്കരണ പരിപാടിയുമായി ദുബായ് പോലീസ്. 29 കായിക ഇനങ്ങളിലായി 400 ഓളം ദുബായ് പോലീസ് അത്‌ലറ്റുകളാണ് ഈ ബോധവൽക്കരണ ദൗത്യത്തിൽ പങ്കാളികളാകുന്നത്. കായികതാരങ്ങളുടെ ആരോഗ്യം സംരക്ഷിക്കുന്നതിനൊപ്പം നിരോധിത മരുന്നുകളുടെയും പാർശ്വഫലങ്ങളുണ്ടാക്കുന്ന കായിക സപ്ലിമെന്റുകളുടെയും അപകടങ്ങളെക്കുറിച്ച് സഹതാരങ്ങൾക്കും പൊതുസമൂഹത്തിനും ഇടയിൽ ബോധവൽക്കരണം നൽകുന്ന അംബാസഡർമാരായി ഇവർ പ്രവർത്തിക്കുമെന്ന് ദുബായ് പോലീസ് സ്‌പോർട്‌സ് ഇന്റഗ്രേഷൻ കൗൺസിൽ അംഗം ലെഫ്റ്റനന്റ് കേണൽ സേലം ബിൻ ഘലൈത്ത വ്യക്തമാക്കി.
സെപ്റ്റംബർ 17-ന് ആരംഭിക്കുന്ന ‘ഇന്റർനാഷണൽ ഫോറം ഓൺ കോംബാറ്റിംഗ് ഡൂപ്പിംഗ് ഇൻ സ്‌പോർട്‌സ്’ ഉച്ചകോടിയോട് അനുബന്ധിച്ചാണ് പദ്ധതി ഉദ്ഘാടനം ചെയ്യുന്നത്. ദുബായ് സ്‌പോർട്‌സ് കൗൺസിൽ, യുഎഇ നാഷണൽ ആന്റി ദോപ്പിംഗ് ഏജൻസി എന്നിവയുടെ സഹകരണത്തോടെയാണ് പുതിയ കായിക സീസണിന്റെ തുടക്കത്തിൽ തന്നെ ബോധവൽക്കരണം സംഘടിപ്പിക്കുന്നത്. ലോക ഉത്തേജക വിരുദ്ധ ഏജൻസിയുടെ (WADA) പുതിയ മാനദണ്ഡങ്ങൾ, അനുമതിയില്ലാത്ത സപ്ലിമെന്റുകളുടെ അപകടങ്ങൾ എന്നിവയെക്കുറിച്ച് ദുബായിലെ വിവിധ കായിക ക്ലബ്ബുകളിലെ കായികതാരങ്ങളെ വ്യക്തമായി ധരിപ്പിക്കുക എന്നതാണ് പരിപാടിയുടെ പ്രധാന ലക്ഷ്യം.