17
അബുദാബി: മിഡിൽ ഈസ്റ്റിലെ ഹാരി പോട്ടർ ആരാധകർക്ക് ആവേശം പകർന്ന് അബുദാബി യാസ് ഐലൻഡിലെ വാർണർ ബ്രോസ് വേൾഡിൽ പുതിയ ഹാരി പോട്ടർ തീം ലാൻഡ് വരുന്നു. പദ്ധതിയുടെ കൂടുതൽ വിവരങ്ങൾ അടങ്ങിയ പ്രധാന പ്രഖ്യാപനം സെപ്റ്റംബർ 7-ന് നടക്കുമെന്ന് വ്യക്തമാക്കുന്ന ടീസർ വീഡിയോ പാർക്ക് അധികൃതർ പുറത്തുവിട്ടു. ഹോഗ്വാർട്സ്, ഡയഗൺ അലി, ഫോർബിഡൻ ഫോറസ്റ്റ് എന്നിവയടക്കം മാന്ത്രിക ലോകത്തിലെ പ്രധാന കാഴ്ചകളെല്ലാം ഇവിടെ പുനഃസൃഷ്ടിക്കും. അബുദാബിയിലെ പ്രമുഖ വിനോദസഞ്ചാര വികസന കമ്പനിയായ മിറാലിന്റെ മേൽനോട്ടത്തിലാണ് പദ്ധതി പൂർത്തിയാകുന്നത്. ലോകമെമ്പാടുമുള്ള സഞ്ചാരികളെ ആകർഷിക്കുന്ന ഈ പുതിയ സംരംഭം അബുദാബി ടൂറിസം മേഖലയ്ക്ക് വലിയ മുന്നേറ്റമാകുമെന്നാണ് പ്രതീക്ഷിക്കുന്നത്.