ഡ്രൈവിംഗ് പെർഫെക്റ്റാണ്, പക്ഷെ ഇൻഷുറൻസ് തുക കൂടുന്നു; യുഎഇയിലെ പുതിയ മാറ്റങ്ങൾ

ദുബൈ : മുൻവർഷങ്ങളിൽ അപകടങ്ങളോ ക്ലെയിമുകളോ ഇല്ലാത്തവർക്കും ഇൻഷുറൻസ് പുതുക്കുമ്പോൾ പ്രീമിയം തുക വർദ്ധിക്കുന്നതായി യുഎഇയിലെ വാഹന ഉടമകൾ. പഴയ വാഹനങ്ങൾക്കും സ്പെയർ പാർട്സുകൾക്ക് ഉയർന്ന വിലയുള്ള ചില ആഡംബര കാറുകൾക്കുമാണ് ഈ നിരക്ക് വർദ്ധനവ് കൂടുതലായി അനുഭവപ്പെടുന്നത്. പൊതുവായ നിരക്ക് വർദ്ധനവിന് പകരം ഓരോ വാഹനത്തിന്റെയും റിസ്ക് പ്രൊഫൈലും അറ്റകുറ്റപ്പണി ചെലവും വിലയിരുത്തിയാണ് (Risk-based pricing) ഇൻഷുറൻസ് കമ്പനികൾ ഇപ്പോൾ തുക നിശ്ചയിക്കുന്നത്. യുഎഇ സെൻട്രൽ ബാങ്കിന്റെ കർശനമായ നിയന്ത്രണങ്ങൾ വിപണിയിലെ വിലക്കയറ്റം നിയന്ത്രിക്കുന്നുണ്ടെങ്കിലും, ഉയർന്ന റിപ്പയറിങ് ചെലവുകൾ കാരണം പ്രീമിയത്തിൽ മാറ്റങ്ങൾ വരുന്നുണ്ട്. നിലവിൽ സാധാരണ സലൂൺ കാറുകളുടെ അടിസ്ഥാന ഇൻഷുറൻസ് നിരക്ക് 750 ദിർഹം മുതൽ 1,300 ദിർഹം വരെയാണ്.