ഇനി അധികം കാത്തിരിക്കേണ്ട! യുഎഇ സ്കൂൾ ഫലപ്രഖ്യാപനത്തിന്റെ സമയക്രമം പുറത്തുവിട്ടു

ദുബായ് : യുഎഇയിലെ പൊതുവിദ്യാലയങ്ങളിലും (Government Schools) മിനിസ്ട്രി ഓഫ് എഡ്യൂക്കേഷൻ (MoE) സിലബസ് പിന്തുടരുന്ന സ്വകാര്യ സ്കൂളുകളിലുമുള്ള 1 മുതൽ 12 വരെയുള്ള ക്ലാസുകളിലെ 2025-2026 അധ്യയന വർഷത്തെ വാർഷിക പരീക്ഷാ ഫല തീയതികൾ പ്രഖ്യാപിച്ചു. വിദ്യാർത്ഥികൾക്ക് തിരക്കില്ലാതെ ഫലം അറിയുന്നതിനായി രണ്ടു ദിവസങ്ങളിലായി വ്യത്യസ്ത സമയങ്ങളിലാണ് ഫലപ്രഖ്യാപനം ക്രമീകരിച്ചിരിക്കുന്നത്.
ആദ്യഘട്ട ഫലപ്രഖ്യാപനം 2026 ജൂലൈ 12 ഞായറാഴ്ച നടക്കും. അന്ന് രാവിലെ 10 മണിക്ക് പന്ത്രണ്ടാം ക്ലാസിലെ വിദ്യാർത്ഥികളുടെയും, ഉച്ചയ്ക്ക് 12 മണിക്ക് 9 മുതൽ 11 വരെയുള്ള ക്ലാസുകളിലെ വിദ്യാർത്ഥികളുടെയും ഫലം പ്രസിദ്ധീകരിക്കും. രണ്ടാം ഘട്ടത്തിൽ ജൂലൈ 13 തിങ്കളാഴ്ച രാവിലെ 10 മണിക്ക് 5 മുതൽ 8 വരെയുള്ള ക്ലാസുകളിലെയും, ഉച്ചയ്ക്ക് 12 മണിക്ക് 1 മുതൽ 4 വരെയുള്ള ക്ലാസുകളിലെയും ഫലങ്ങൾ ലഭ്യമാകും. വിദ്യാർത്ഥികൾക്കും രക്ഷിതാക്കൾക്കും നിശ്ചിത സമയത്തു വിദ്യാർത്ഥി പോർട്ടൽ (Student Portal) വഴി ഫലം പരിശോധിക്കാവുന്നതാണ്. അതത് ഫലപ്രഖ്യാപന ദിവസങ്ങളിൽ രാത്രി 8 മണി മുതൽ അർദ്ധരാത്രി 12 മണി വരെ ഡിജിറ്റൽ സർട്ടിഫിക്കറ്റുകൾ പ്രിന്റ് ചെയ്യാനുള്ള സൗകര്യവും പോർട്ടലിൽ ലഭ്യമായിരിക്കുമെന്ന് മന്ത്രാലയം അറിയിച്ചു.