ദുബായ് വാഹനാപകടം: ഇരകളുടെ കുടുംബങ്ങൾക്ക് ഡോ. ഷംഷീർ വയലിലിന്റെ ധനസഹായം കൈമാറി

ദുബായ് : ദുബായ് എമിറേറ്റ്സ് റോഡിലുണ്ടായ ദാരുണമായ വാഹനാപകടത്തിൽ മരിച്ച പ്രവാസി തൊഴിലാളികളുടെ കുടുംബങ്ങൾക്കുള്ള ധനസഹായം കൈമാറി. ബുർജീൽ ഹോൾഡിങ്സ് ചെയർമാൻ ഡോ. ഷംഷീർ വയലിൽ പ്രഖ്യാപിച്ച 10 ലക്ഷം ദിർഹത്തിന്റെ (ഏകദേശം 2.6 കോടി രൂപ) പുനരധിവാസ പാക്കേജിന്റെ ഭാഗമായാണ് തുക നൽകിയത്. വിപിഎസ് ഹെൽത്ത് കെയർ പ്രതിനിധികൾ ഇന്ത്യയിലെയും ശ്രീലങ്കയിലെയും ഉൾഗ്രാമങ്ങളിൽ നേരിട്ടെത്തിയാണ് ഇരകളുടെ ആശ്രിതർക്ക് സഹായം എത്തിച്ചത്.
അപകടത്തിൽ മരിച്ച ആറ് ഇന്ത്യക്കാരുടെയും ഒരു ശ്രീലങ്കൻ പൗരന്റെയും കുടുംബങ്ങൾക്ക് 26 ലക്ഷം രൂപ (100,000 ദിർഹം) വീതമാണ് കൈമാറിയത്. കൂടാതെ, അപകടത്തിൽ പരിക്കേറ്റ മലയാളി തൊഴിലാളികൾ ഉൾപ്പെടെ ഒൻപത് പേർക്കും പരിക്കുകളുടെ തീവ്രതയനുസരിച്ച് സാമ്പത്തിക സഹായം ഉറപ്പാക്കിയിട്ടുണ്ട്. ദുരന്തത്തിൽപ്പെട്ട കുടുംബങ്ങളിലെ കുട്ടികളുടെ ഉപരിപഠനത്തിനുള്ള സഹായവും ഇതോടൊപ്പം വാഗ്ദാനം ചെയ്തിട്ടുണ്ട്.