പള്ളികൾക്ക് സമീപമുള്ള അനധികൃത പാർക്കിംഗ്; മുന്നറിയിപ്പുമായി അബുദാബി അധികൃതർ

അബുദാബി : പള്ളികൾക്ക് സമീപം നിശ്ചിതമല്ലാത്ത സ്ഥലങ്ങളിൽ വാഹനങ്ങൾ പാർക്ക് ചെയ്യുന്നതിനെതിരെ ഡ്രൈവർമാർക്ക് കർശന മുന്നറിയിപ്പ് നൽകി അബുദാബി മൊബിലിറ്റിയും (AD Mobility) ക്യു മൊബിലിറ്റിയും (Q Mobility). പ്രാർത്ഥനാ സമയങ്ങളിൽ പള്ളികൾക്ക് സമീപം അലക്ഷ്യമായി വാഹനം പാർക്ക് ചെയ്യുന്നത് മറ്റ് വിശ്വാസികൾക്കും കാൽനടയാത്രക്കാർക്കും അടിയന്തര സേവന വാഹനങ്ങൾക്കും വലിയ തടസ്സം സൃഷ്ടിക്കുന്നതായി അധികൃതർ ചൂണ്ടിക്കാട്ടി. സുഗമമായ ഗതാഗതം ഉറപ്പാക്കാനും എല്ലാവരുടെയും സുരക്ഷ മുൻനിർത്തിയും നിർദ്ദിഷ്ട പാർക്കിംഗ് സ്ഥലങ്ങൾ മാത്രം ഉപയോഗിക്കാൻ ഡ്രൈവർമാരോട് ആവശ്യപ്പെട്ടിട്ടുണ്ട്. നിയമം ലംഘിക്കുന്നവർക്ക് പിഴ ഉൾപ്പെടെയുള്ള കർശനമായ നിയമനടപടികൾ നേരിടേണ്ടി വരുമെന്നും അധികൃതർ സോഷ്യൽ മീഡിയ വഴി അറിയിച്ചു.