ക്ലാസ് മുറിയിൽ തേനീച്ചക്കൂട്; ജൈവവൈവിധ്യത്തിന്റെ പാഠങ്ങളുമായി ദുബായിലെ സ്കൂൾ

ദുബായ് : വിദ്യാർത്ഥികളിൽ പരിസ്ഥിതി ബോധവും ജൈവവൈവിധ്യവും വളർത്തിയെടുക്കുക എന്ന ലക്ഷ്യത്തോടെ സ്കൂൾ കാമ്പസിനുള്ളിൽ ജീവനുള്ള തേനീച്ചക്കൂട് സ്ഥാപിച്ച് ദുബായിലെ ദേര ഇന്റർനാഷണൽ സ്കൂൾ (Deira International School). ടെറ എക്‌സ്‌പോ സിറ്റി ദുബായിയുടെ ‘ഹൺഡ്രഡ് ഹൈവ്സ്’ (Hundred Hives) പദ്ധതിയുടെ ഭാഗമായാണ് വിദ്യാലയത്തിൽ ഈ തേനീച്ചക്കോളനി ഒരുക്കിയിരിക്കുന്നത്. ഇതോടെ കാമ്പസിൽ സ്വന്തമായി തേനീച്ചക്കൂട് സ്ഥാപിക്കുന്ന ദുബായിലെ ആദ്യ സ്കൂളായി ദേര ഇന്റർനാഷണൽ സ്കൂൾ മാറി. 2,500-ലധികം വരുന്ന വിദ്യാർത്ഥികൾക്കും ജീവനക്കാർക്കും തേനീച്ചകളുടെ ജീവിതം നേരിട്ട് കണ്ടു മനസ്സിലാക്കാൻ ഈ പദ്ധതിയിലൂടെ സാധിക്കും.
ഈ പദ്ധതി വെറും തേൻ ശേഖരണത്തിന് വേണ്ടിയുള്ളതല്ലെന്നും യുഎഇയുടെ നാഷണൽ ഫുഡ് സെക്യൂരിറ്റി സ്ട്രാറ്റജി 2051-ന് (Food Security Strategy 2051) പിന്തുണ നൽകുന്ന ജൈവവൈവിധ്യ സംരക്ഷണത്തിനായുള്ള വലിയൊരു ചുവടുവെപ്പാണെന്നും സ്കൂൾ അധികൃതർ വ്യക്തമാക്കി. പരിസ്ഥിതി പഠനം പുസ്തകങ്ങളിൽ ഒതുക്കാതെ കുട്ടികൾക്ക് പ്രായോഗിക ജ്ഞാനം നൽകുകയാണ് ഇതിലൂടെ ചെയ്യുന്നത്. വരും വർഷങ്ങളിൽ സ്കൂളിലെ ഹൈഡ്രോപോണിക്സ് ടവറുകളുമായി ഇതിനെ ബന്ധിപ്പിക്കാനും കുട്ടികൾ ശേഖരിക്കുന്ന തേൻ അവരെക്കൊണ്ട് തന്നെ ബ്രാൻഡ് ചെയ്ത് വിതരണം ചെയ്യാനും സ്കൂൾ ലക്ഷ്യമിടുന്നുണ്ട്. ടെറ എക്‌സ്‌പോ സിറ്റിയുമായി സഹകരിച്ച് ഇതിനായി സ്കൂളിലെ അധ്യാപകർക്ക് പ്രത്യേക ബീകീപ്പിംഗ് (Beekeeping) പരിശീലനവും നൽകിയിട്ടുണ്ട്.