ദുബായ് : കഴിഞ്ഞ ഒരു മാസമായി വലിയ ഏറ്റക്കുറച്ചിലുകൾക്ക് സാക്ഷ്യം വഹിക്കുന്ന യുഎഇയിലെ സ്വർണ്ണവിലയിൽ വൻ ഇടിവ്. ചൊവ്വാഴ്ച രാവിലെ ദുബായിൽ 24 കാരറ്റ് സ്വർണ്ണത്തിന്റെ വില ഗ്രാമിന് 500 ദിർഹത്തിന് താഴെയെത്തി. ജൂൺ 10-ന് ശേഷമുള്ള ഏറ്റവും കുറഞ്ഞ നിരക്കാണിത്.രാവിലെ 10.35-ലെ കണക്കനുസരിച്ച് 24 കാരറ്റ് സ്വർണ്ണത്തിന് ഗ്രാമിന് 496.25 ദിർഹമാണ് വില (തിങ്കളാഴ്ച ഇത് 506 ദിർഹമായിരുന്നു). പ്രവാസികൾക്കിടയിൽ ഏറ്റവും ജനപ്രിയമായ 22 കാരറ്റ് സ്വർണ്ണവില ഗ്രാമിന് 459.50 ദിർഹമായി കുറഞ്ഞു. തിങ്കളാഴ്ചത്തെ വിലയായ 468.50 ദിർഹത്തിൽ നിന്നാണ് ഈ ഇടിവ്. ഈ മാസത്തിന്റെ തുടക്കത്തിൽ (ജൂൺ 2) 24 കാരറ്റിന് 542.50 ദിർഹവും 22 കാരറ്റിന് 502.25 ദിർഹവുമായിരുന്നു ദുബായിലെ നിരക്ക്. ഇതിൽ നിന്നാണ് യഥാക്രമം 46.25 ദിർഹവും 42.75 ദിർഹവും ഈ മാസം മാത്രം കുറഞ്ഞത്.
അന്താരാഷ്ട്ര വിപണിയിൽ ഡോളർ കരുത്താർജ്ജിച്ചതും അമേരിക്കൻ കേന്ദ്ര ബാങ്കായ ഫെഡറൽ റിസർവ് (Fed) പലിശനിരക്കുകൾ ദീർഘകാലത്തേക്ക് ഉയർന്ന നിലയിൽ നിലനിർത്തിയേക്കുമെന്ന സൂചനകളുമാണ് സ്വർണ്ണവില ഇടിയാൻ പ്രധാന കാരണം. രാജ്യാന്തര വിപണിയിൽ സ്വർണ്ണവില ഔൺസിന് 4,115 ഡോളർ നിലവാരത്തിലേക്ക് താഴ്ന്നു. കൂടാതെ മിഡിൽ ഈസ്റ്റിലെ സംഘർഷാവസ്ഥ താൽക്കാലികമായി ശാന്തമായതും സുരക്ഷിത നിക്ഷേപമെന്ന നിലയിൽ സ്വർണ്ണത്തിനുള്ള ഡിമാൻഡ് കുറയാൻ കാരണമായിട്ടുണ്ടെന്ന് വിപണി വിദഗ്ദ്ധർ വിലയിരുത്തുന്നു. വില കുറഞ്ഞത് വേനലവധിക്കാലത്ത് നാട്ടിലേക്ക് പോകുന്ന പ്രവാസികൾക്കും ജ്വല്ലറി ഉപഭോക്താക്കൾക്കും വലിയ അനുകൂല അവസരമാണ് ഒരുക്കിയിരിക്കുന്നത്.
19