അബുദാബി : സ്മാർട്ട് ഗതാഗത സംവിധാനങ്ങൾ പ്രോത്സാഹിപ്പിക്കുന്നതിന്റെ ഭാഗമായി മിഡിൽ ഈസ്റ്റ്-നോർത്ത് ആഫ്രിക്ക (MENA) മേഖലയിലെ ആദ്യത്തെ ഡ്രൈവറില്ലാ പബ്ലിക് ബസ് (Autonomous Public Bus) പരീക്ഷണ ഓട്ടത്തിന് അബുദാബി ഒരുങ്ങുന്നു. അബുദാബി ഡിപ്പാർട്ട്‌മെന്റ് ഓഫ് മുൻസിപ്പാലിറ്റീസ് ആൻഡ് ട്രാൻസ്‌പോർട്ടിന്റെ കീഴിലുള്ള ‘അബുദാബി മൊബിലിറ്റി’യും എമിറാത്തി സ്മാർട്ട് മൊബിലിറ്റി കമ്പനിയായ ‘ലുമോ’യും (Lumo) ചേർന്ന് ഈ പദ്ധതി നടപ്പിലാക്കുന്നതിനായുള്ള ചർച്ചകൾ നടത്തി.
2040-ഓടെ അബുദാബിയിലെ ആകെ യാത്രകളുടെ 25 ശതമാനവും ഡ്രൈവറില്ലാ വാഹനങ്ങൾ വഴിയാക്കുക എന്ന ലക്ഷ്യത്തോടെയുള്ള ‘അബുദാബി സ്മാർട്ട് ആൻഡ് ഓട്ടോണമസ് മൊബിലിറ്റി സ്ട്രാറ്റജി’യുടെ ഭാഗമായാണ് ഈ നീക്കം. ആർട്ടിഫിഷ്യൽ ഇന്റലിജൻസ് സാങ്കേതികവിദ്യ പ്രയോജനപ്പെടുത്തി പൊതുഗതാഗത രംഗം കൂടുതൽ സുസ്ഥിരവും കാര്യക്ഷമവുമാക്കാൻ ഈ പദ്ധതിയിലൂടെ സാധിക്കുമെന്ന് അബുദാബി മൊബിലിറ്റി ഇന്റലിജന്റ് ട്രാൻസ്‌പോർട്ട് സിസ്റ്റംസ് സെക്ടർ എക്‌സിക്യൂട്ടീവ് ഡയറക്ടർ ഹമദ് ആദിൽ അൽ അഫീഫിയും ലുമോ സിഇഒ സീൻ ടിയോയും വ്യക്തമാക്കി.