അബുദാബി : യുഎഇയിൽ വേനൽക്കാലം കടുക്കുന്നതിന്റെ സൂചനകൾ നൽകി താപനില 50 ഡിഗ്രിയോട് അടുക്കുന്നു. ശനിയാഴ്ച (ജൂൺ 20) രാജ്യത്തെ ഏറ്റവും ഉയർന്ന താപനിലയായ 49.4 ഡിഗ്രി സെൽഷ്യസ് അൽ ഐനിലെ സ്വീഹാനിൽ (Sweihan) രേഖപ്പെടുത്തി. യുഎഇ സമയം ഉച്ചയ്ക്ക് 12.45-നാണ് നാഷണൽ സെന്റർ ഓഫ് മെറ്റീരിയോളജി (NCM) ഈ റെക്കോർഡ് താപനില രേഖപ്പെടുത്തിയത്.
ഈ വർഷത്തെ മുൻ മാസങ്ങളെ അപേക്ഷിച്ച് താപനിലയിൽ വലിയ വർദ്ധനവാണ് ഇപ്പോൾ ഉണ്ടായിരിക്കുന്നത്. ഏപ്രിൽ 21-ന് അൽ ദഫ്ര മേഖലയിലെ ഔതൈദിൽ രേഖപ്പെടുത്തിയ 42.9 ഡിഗ്രി സെൽഷ്യസ് ആയിരുന്നു ഇതിനു മുൻപത്തെ ഉയർന്ന നിരക്ക്. വരും ദിവസങ്ങളിൽ യുഎഇയിൽ സാധാരണയേക്കാൾ കൂടുതൽ ചൂട് അനുഭവപ്പെടാൻ സാധ്യതയുണ്ടെന്ന് കാലാവസ്ഥാ നിരീക്ഷകർ മുന്നറിയിപ്പ് നൽകുന്നുണ്ട്. വരും മാസങ്ങളിൽ ചൂട് ഇനിയും വർദ്ധിക്കുമെന്നും എന്നാൽ അന്തരീക്ഷത്തിലുണ്ടാകുന്ന മാറ്റങ്ങൾക്ക് അനുസരിച്ച് ഇതിൽ വ്യത്യാസങ്ങൾ വരാമെന്നും എൻസിഎം വിദഗ്ദ്ധനായ ഡോ. അഹമ്മദ് ഹബീബ് വ്യക്തമാക്കി.